Ադրբեջանի նախագահ Իլհամ Ալիևը երկուշաբթի ընդունել է Եվրոպայի խորհրդի գլխավոր քարտուղար Մարիա Պեյչինովիչ-Բուրիչին, զրուցակիցները քննարկել են երկկողմ հարաբերությունները, Հարավային Կովկասում տեղի ունեցող գործընթացները, «Ինտերֆաքս Ադրբեջան»-ի փոխանցմամբ՝ հայտնում է պետության ղեկավարի պաշտոնական կայքը։
«Զրույցի ընթացքում նշվել է, որ Ադրբեջանի և Եվրոպայի խորհրդի 2022-2025 թվականների գործողությունների ծրագիրը, որը կընդունվի մոտ ապագայում, նախատեսում է համագործակցություն մի շարք ոլորտներում»,- ասվում է տեղեկատվության մեջ։
Ալիևը Պեյչինովիչ-Բուրիչին տեղեկացրել է նաև Հարավային Կովկասում ստեղծված նոր իրավիճակի, Հայաստանի հետ հարաբերությունները կարգավորելու Ադրբեջանի առաջարկների, ինչպես նաև Ադրբեջանի ազատագրված տարածքներում առկա իրավիճակի մասին։
«Եվրախորհուրդը կարող է խաղալ հարթակի դեր, որը կնպաստի երկու երկրների միջև վստահության ձևավորմանը և Հարավային Կովկասի ինտեգրված տարածաշրջանի ստեղծմանը»,- ասել է Ալիևը։
Պեյչինովիչ-Բուրիչն իր հերթին նշել է, որ Եվրոպայի խորհուրդը պատրաստ է հարթակի դեր խաղալ Հայաստանի և Ադրբեջանի միջև հարաբերությունների կարգավորման և երկու երկրների հասարակությունների միջև վստահության ամրապնդման գործընթացում։
«Կողմերը մտքեր են փոխանակել նաև փոխադարձ հետաքրքրություն ներկայացնող այլ հարցերի շուրջ»,- ասվում է տեղեկատվության մեջ։
