ՀՀ-ն պետք է արձագանքի Իրանի սահմանների մոտ ԱՄՆ-ի ներկայության հնարավոր ռիսկերին, մամուլի ասուլիսում հայտարարել է ՀՀ-ում Իրանի դեսպան Խալիլ Շիրղոլամին: Այս մասին նա հայտարարել է ասուլիսին՝ մեկնաբանելով ԱՄՆ-ի հետ ռազմական գործողությունների ֆոնին TRIPP (Trump Route for International Peace and Prosperity, «Թրամփի՝ միջազգային խաղաղության և բարգավաճման երթուղի») նախագծի իրականացումը։
Դեսպանի խոսքով՝ Իրանին ՀՀ կառավարությունից հավաստիացրել են, որ TRIPP նախագծի իրականացման համատեքստում որևէ մարտահրավեր կամ սպառնալիք Իրանի համար չի ստեղծվի։
Այդուհանդերձ, իրանական կողմը հորդորում է ապաշրջափակման գործընթացին զուգահեռ ՀՀ-ին հստակ մեխանիզմներով կառավարել Վաշինգտոնի հնարավոր ներկայության ռիսկերը, նշնել է դեսպանը։
«Պետք է ունենաք մի մեխանիզմ, որ ՀՀ-ն իրականացնի ապաշրջափակման իր ամբողջ ներուժը, սակայն ի լրումն դրա և դրա կողքին պետք է կառավարվի և պետք է հստակ կերպով արձագանք տրվի ԱՄՆ-ի ներկայության հնարավոր ռիսկերի և Իրանի դեմ ունեցած սպառնալիքների»,- նշել է Շիրղոլամին։
Երևանն ու Թեհրանը շարունակում են ռազմավարական գործընկերության համաձայնագրի տեխնիկական մշակումը, ինչի շուրջ երկու երկրների ղեկավարները հստակ հավաստիացումներ են փոխանակել, հայտնել է դեսպանը։
«Իրանն իր կողմից հետամուտ քայլեր է ձեռնարկում ռազմավարական գործընկերության համապարփակ աստաթղթի ստորագրման և այս ճանապարհին շարունակում է վճռական քայլեր ձեռնարկել»,- հավաստիացրել է նա։
Դեսպանի խոսքով՝ այս պահին փաստաթուղթը կազմելու ու հստակեցնելու շուրջ աշխատանքներ են տարվում։
«Այս փաստաթղթով, կարծում եմ, որ նոր մթնոլորտ կստեղծվի հայ-իրանական հարաբերություններում և նոր պատուհան կբացվի հետագա համագործակցության համար՝ այդ թվում նաև տարբեր ոլորտներում․ թե՛ քաղաքական, թե՛ անվտանգության, թե՛ ներդրումների, թե՛ տնտեսական, թե՛ պաշտպանական ոլորտում հստակ ուղենիշներ կտրվեն համագործակցության հետագա ուղղությունների համար»,- շեշտել է Շիրղոլամին։
Անդրադառնալով երկրների միջև առևտրաշրջանառությանը, դեսպանն ասել է, թիրախային 3 մլրդ նշաձողին հասնելու համար ներկայիս 700 միլիոն դոլարի ցուցանիշը պետք է քառապատկվի։
Խոսելով էներգետիկայի ոլորտում երկրների միջև փոխկապվածության մասին, նա ասել է, որ իրանական կողմը հույս ունի,
որ Հայաստանը կկարողանա ստեղծել համապատասխան ենթակառուցվածքներ իրանական հումքի վերամշակման համար։
«Էներգետիկայի ոլորտում մենք կարող ենք երկու երկրների միջև էներգետիկ փոխկապվածության նոր նոր աստիճանի հասնել։ Հուսով ենք, որ Հայաստանը նաև կունենա իր նավթազտարանը, որտեղ որ Իրանի հում նավթից կստանան անհրաժեշտ նավթամթերքը, թե՛ Հայաստանի, թե՛ Հայաստանի դուրս»,- շեշտել է դեսպանը։
Նա հույս է հայտնել, որ կամրապնդվի կապը Իրանի և Մեղրիի ազատ տնտեսական գոտու միջև, իսկ տարանցման համատեքստում կապահովվի Ջուլֆայից մինչև Սև ծով հասնող երկաթգծի գործարկումը։
TRIPP տրանսպորտային երթուղի ստեղծելու մասին հռչակագիրը Հայաստանի և Ադրբեջանի ղեկավարներն ԱՄՆ-ի միջնորդությամբ ստորագրել էին օգոստոսի 8-ին՝ Վաշինգտոնում: Հունվարի 13-ին ՀՀ ԱԳ նախարար Արարատ Միրզոյանը և ԱՄՆ պետքարտուղար Մարկո Ռուբիոն ստորագրել էին TRIPP նախագծի իրականացման մասին հռչակագիրը: Նախաձեռնության իրականացման համար կստեղծվի TRIPP զարգացման ընկերությունը, որտեղ բաժնետոմսերի 74%-ը կստանա ԱՄՆ-ն՝ նախնական ներդրումների դիմաց, իսկ 26%-ը՝ Հայաստանը:
