Բաքուն քննադատել է ԱՄՆ Պետդեպարտամենտի հայտարարությունը Հայաստանի տարածքային ամբողջականությանն աջակցելու մասին և սպառնացել Վաշինգտոնին «համարժեք պատասխանով», հաղորդում են ադրբեջանական լրատվամիջոցները։
«Անընդունելի է Ադրբեջանի հետ խոսել սպառնալիքների լեզվով։ Ադրբեջանի դեմ ցանկացած ոչ բարեկամական գործողություն դրական արդյունքների չի բերի, և նման գործողություններին համարժեք պատասխան կլինի»,- լրատվամիջոցներին հայտնել է Ադրբեջանի ԱԳՆ մամուլի քարտուղար Այխան Հաջիզադեն։
Նա նաև հավելել է, որ ԱՄՆ-ն Հայաստանին սխալ է ուղղորդում․ «Հենց միջնորդական ջանքերի ձախողումն էր, որին մասնակցում էր նաև Միացյալ Նահանգները, որ դրդեցին Ադրբեջանին հարցը լուծել ռազմական ճանապարհով։ Ուստի ԱՄՆ-ն նույնպես պատասխանատու է հակամարտությունը խաղաղ ճանապարհով լուծելու իր անգործության համար»,- ասել է Հաջիզադեն։
Նոյեմբերի 1-ին ԱՄՆ Պետդեպարտամենտը վերահաստատել էր իր ամուր աջակցությունը Հայաստանին և ընդգծել, որ «Հայաստանի ինքնիշխանության և տարածքային ամբողջականության ցանկացած խախտում կհանգեցնի լուրջ հետևանքների»։ Հոկտեմբերի 31-ին Ցեղասպանությունների կանխարգելման Լեմկինի միջազգային ինստիտուտը զգուշացրել էր առաջիկա օրերին և շաբաթներին Ադրբեջանի կողմից Հայաստան ներխուժելու սպառնալիքի մասին։
