Հայաստանը նախօրեին Բաքվից ստացել է խաղաղության պայմանագրի շուրջ իր առաջարկները։ Այս մասին «Արմենպրես»-ի հետ զրույցում ասել է ՀՀ ԱԳ նախարար Արարատ Միրզոյանը։
«Ինչպես տեղյակ եք, մենք Ադրբեջանին ենք ներկայացրել մեր առաջարկները հարաբերությունների կարգավորման կամ խաղաղության պայմանագրի նախագծի վերաբերյալ և նախօրեին ենք միայն ստացել նրանց պատասխանները: Այսպիսով՝ քննարկումները շարունակվում են: Մենք հույս ունենք այս հարցում համաձայնության հասնել հնարավորինս շուտ, և այս գործընթացում կարևոր դերակատարություն կարող են ունենալ նաև մեր միջազգային գործընկերների միջնորդական ջանքերը»,- հայտնել է Միրզոյանը։
Անդրադառնալով ականազերծման թեմային՝ Միրզոյանը նշեց, որ Հայաստանը միակողմանիորեն Ադրբեջանին է փոխանցել իր ունեցած ականապատ դաշտերի բոլոր քարտեզները՝ չնայած նման պարտավորությունների բացակայությանը թե՛ եռակողմ համաձայնագրերի, թե՛ միջազգային իրավունքի շրջանակներում։
«Ինչպես տեղյակ եք, Հայաստանի Հանրապետությունը միակողմանիորեն Ադրբեջանին է փոխանցել ականապատ դաշտերի՝ իր մոտ առկա բոլոր քարտեզները, չնայած նման հանձնառության բացակայությանը ինչպես եռակողմ պայմանավորվածությունների, այնպես էլ միջազգային իրավունքի շրջանակներում»,- ասել է նախարարը։
Միրզոյանն ընդգծեց, որ Լեռնային Ղարաբաղում և հարակից տարածքներում ականներ են դրվել առաջին ղարաբաղյան պատերազմի տարիներին, և դա հիմնականում իրականացրել է Ադրբեջանը, որը վերահսկում էր այդ տարածքները Առաջին պատերազմից ի վեր։
«Հայկական կողմի համագործակցության կոչերը մնացին անպատասխան։ Ավելին, Ադրբեջանը բոլոր հնարավոր ձևերով խոչընդոտներ է ստեղծել ականազերծման աշխատանքների իրականացման համար»,- ասել է նա։
Պատասխանելով հարցին, թե Բաքուն կրկին հնչեցնում է պատմական քարտեզների հիման վրա սահմանազատման գործընթացն իրականացնելու մասին թեզը, Միրզոյանը շեշտել է, որ նման հայտարարությունները խախտում են Պրահայում և Սոչիում ստանձնած հանձնառությունը։
«Նման հայտարարությունները խախտում են Պրահայում և Սոչիում ստանձնած հանձնառությունը՝ երկու երկրների միջև սահմանազատման աշխատանքներն իրականացնել՝ հիմք ընդունելով ՄԱԿ կանոնադրությունը և Ալմա-Աթայի հռչակագիրը»,- ասել է նա։
Միրզոյանի խոսքով՝ այդ հանձնառության շրջանակներում սահմանազատման աշխատանքները պետք է իրականացվեն 1991 թվականի՝ ԽՍՀՄ փլուզման ամսաթվի դրությամբ գոյություն ունեցած և իրավական ուժ և նշանակություն ունեցած իրավական ակտերի հիման վրա, ընդ որում՝ նույն ամսաթվի դրությամբ քարտեզագրում իրականացնելու, քարտեզներ կազմելու և քարտեզներ հրապարակելու պատշաճ լիազորություններ ունեցող կառույցների պաշտոնական փաստաթղթերի հիման վրա: Ըստ այդմ, պատմական քարտեզների մասին խոսելն առնվազն անհասկանալի է՝ և՛ ըստ սահմանման, և՛ ըստ բովանդակության:
«Պետք է ընդգծել նաև պատմական քարտեզների ընդհանրական հռետորաբանության վտանգավորությունը մեր երկրների անկախության համար, որովհետև եթե շեշտ դնենք պատմական քարտեզների վրա, կարող է պարզվել, որ և՛ Հայաստանի Հանրապետության, և՛ առավել ևս Ադրբեջանի Հանրապետության այսօրվա տարածքները դարերով եղել են այլ պետությունների տարածքներ»,- ասել է նա:
