Այսօր՝ հուլիսի 9-ին, խորհրդարանը շարունակել է ՀՀ Ազգային ժողովի արտահերթ նստաշրջանի աշխատանքը։ Նիստի օրակարգը ներառել է 5 հարց։
Խորհրդարանը նախ 2-րդ ընթերցմամբ քննարկել է կառավարության հեղինակած «Ավտոմոբիլային ճանապարհների մասին» ՀՀ օրենքում փոփոխություններ եւ լրացումներ կատարելու մասին» եւ կից օրենքների նախագծերի փաթեթը։
Օրենքի նախագիծը խորհրդարանականների քննարկմանն է ներկայացրել վարչապետի աշխատակազմի տեսչական մարմինների աշխատանքների համակարգման գրասենյակի ղեկավար Արթուր Ասոյանը՝ նշելով, որ քաղաքաշինական, տեխնիկական եւ հրդեհային անվտանգության տեսչական մարմնի գործունեությանը վերաբերող թվով 14 օրենքներում առաջարկվող փոփոխությունների եւ լրացումների նպատակն է ամրագրել տեսչական մարմինների բնականոն գործունեության համար անհրաժեշտ եւ բավարար նախադրյալներ:
«Ըստ օրենքի նախագծի կստեղծվեն հողի բերրի շերտի վաճառքի համար իրավական հիմքեր, կկարգավորվի բեռնատար մեքենաների կշռման հարցը եւ սուբվենցիոն ծրագրերի կանոնավոր ստուգումները»,- ասել է Ասոյանը։
Օրենքն ընդունվել է 83 կողմ ձայներով։
Այնուհետեւ խորհրդարանը քննարկել է «Պետական նպաստների մասին» ՀՀ օրենքում փոփոխություններ կատարելու մասին» եւ «Ժամանակավոր անաշխատունակության եւ մայրության նպաստների մասին» ՀՀ օրենքում փոփոխություններ եւ լրացումներ կատարելու մասին» օրենքների նախագծերի փաթեթը:
ՀՀ աշխատանքի եւ սոցիալական հարցերի նախարարի տեղակալ Սմբատ Սաիյանի ներկայացմամբ՝ նպատակը ժամանակավոր անաշխատունակության, մայրության, մինչեւ երկու տարեկան երեխայի խնամքի նպաստներին առնչվող հարակից օրենսդրության մեջ կատարված փոփոխություններից բխող նոր կարգավորումներ սահմանելն է:
Չաշխատող անձի մայրության նպաստին եւ մինչեւ 2 տարեկան երեխայի խնամքի նպաստի իրավունքին անդրադառնալու անհրաժեշտություն է առաջացել նաեւ միկրոձեռնարկատիրության համակարգի ներդրմամբ։
«Հաշվի առնելով միկրոձեռնարկատիրության մեջ ներգրավված եւ այլ գործատուների վարձու աշխատողների եկամտային հարկի հաշվարկման տարբերությունը՝ առաջարկվել է ժամանակավոր անաշխատունակության նպաստը եւ մայրության նպաստը հաշվարկելու համար հիմք ընդունվող միջին ամսական աշխատավարձը հաշվարկելիս վարձու աշխատողի՝ միկրոձեռնարկատիրության մեջ ներգրավված լինելու ժամանակահատվածի յուրաքանչյուր ամսվա համար՝ որպես տվյալ գործատուի կողմից վարձու աշխատողին վճարված եկամուտ, ընդունել ժամանակավոր անաշխատունակությունն առաջանալու օրվա դրությամբ սահմանված նվազագույն ամսական աշխատավարձի հիսուն տոկոսը»,- ասել է Սմբատ Սաիյանը:
Հարցի քննարկումն ավարտվել է 85 կողմ ձայներով։
Օրակարգի հաջորդ կետը ՀՀ ԱԺ պատգամավորներ Վլադիմիր Վարդանյանի եւ Աննա Կարապետյանի հեղինակած «Դատախազության մասին» օրենքում լրացում եւ փոփոխություն կատարելու մասին» օրենքի նախագիծն էր, որը խորհրդարանականների քննարկմանն է ներկայացրել հիմնական զեկուցող Վլադիմիր Վարդանյանը:
««Դատախազության մասին» ՀՀ օրենքի 38-րդ հոդվածի համաձայն` բաց մրցույթն անցկացնում է դատախազության որակավորման հանձնաժողովը տարին մեկ անգամ, որպես կանոն, յուրաքանչյուր տարվա հունվար ամսին: Նման կարգավորման պայմաններում տարվա ընթացքում հնարավոր է անցկացնել միայն մեկ բաց մրցույթ, մինչդեռ, ըստ բանախոսի, որոշ դեպքերում դատախազների թեկնածությունների ցուցակը համալրելու նպատակով օբյեկտիվորեն անհրաժեշտություն է առաջանում անցկացնել արտահերթ մրցույթ: Առաջարկվող կարգավորմամբ հնարավորություն կստեղծվի տվյալ տարվա ընթացքում անհրաժեշտության դեպքում անցկացնել նաեւ արտահերթ բաց մրցույթ»- ասել է Վարդանյանը:
Օրենքը երկրորդ ընթերցմամբ ընդունվել է 85 կողմ ձայներով։
Ներկայացնելով ՀՀ ԱԺ պատգամավորներ Արթուր Դավթյանի, Վլադիմիր Վարդանյանի, Աննա Կարապետյանի հեղինակած «ՀՀ վարչական դատավարության օրենսգրքում լրացումներ կատարելու մասին» օրենքի նախագիծը՝ հիմնական զեկուցող Արթուր Դավթյանը նշել է, որ նախագծով առաջարկվում է ՀՀ վարչական դատավարության օրենսգրքում կատարել այնպիսի լրացումներ, որոնք հնարավոր կդարձնեն վարչական գործով պետական տուրքերի առցանց վճարումն իրականացնել պետական վճարումների էլեկտրոնային համակարգի միջոցով, ինչը ՀՀ կառավարության կողմից հաստատված դատաիրավական բարեփոխումների ռազմավարությանը եւս համահունչ է:
Որոշումն ընդունվել է 85 կողմ ձայներով։
Նիստի օրակարգի վերջին հարցը «Զինվորական ծառայության եւ զինծառայողի կարգավիճակի մասին» ՀՀ օրենքում լրացում կատարելու մասին» օրենքի նախագիծն էր։ ՀՀ ԱԺ պատգամավոր Սոֆիա Հովսեփյանը խորհրդարանի քննարկմանն է ներկայացրել նախագիծը եւ նշել, որ օրենքի ընդունման դեպքում զոհված (մահացած) զինծառայողների ընտանիքի անդամները կարող են ուսանել ՀՀ պետական հավատարմագրված ուսումնական հաստատություններում` ՀՀ պետական բյուջեի միջոցների հաշվին:
Հարակից զեկուցող ՀՀ ԱԺ պաշտպանության եւ անվտանգության հարցերի մշտական հանձնաժողովի անդամ Արմեն Խաչատրյանը կարեւորել է նախագծի ընդունումն ու կոչ է արել կողմ քվեարկել:
Օրենքն ընդունվել է 86 կողմ ձայներով։
Արտահերթ նստաշրջանի օրակարգն այսքանով սպառվել է։
