«Քաղաքացիական պայմանագիր» կուսակցությունում կարծում են, որ Փարաքարի համայնքապետ Վալոդյա Գրիգորյանի սպանությունից հետո ՆԳՆ մի շարք բարձրաստիճան ոստիկաններ պետք է պաշտոնանկ արվեն, ընդհուպ՝ ՆԳ նախարար Արփինե Սարգսյանը, գրել է «Հրապարակ» օրաթերթը՝ հղում անելով իշխանական աղբյուրներին։
Ոստիկանության Վաղարշապատի բաժնի պետ Փայլակ Շմավոնյանը մոտ 20 օր առաջ է նշանակվել պաշտոնին, և համակարգում չեն կարծում, թե կատարվածի պատասխանատվությունը պետք է կոտրվի նրա ուսերին, նշել է լրատվականը։
Թերթի տեղեկությամբ՝ ՔՊ որոշ անդամներ կարծում են, որ ՀՀ վարչապետ Նիկոլ Փաշինյանի թիվ մեկ խնդիրը վայրկյան առաջ համայնքապետի սպանության բացահայտմանը հասնելն է, քանի որ այն սովորական սպանություն չէ։ Չնայած Փաշինյանի դատապարտող գրառմանը՝ մինչև աշխատանքային օրվա ավարտը ՆԳՆ-ում այդպես էլ խորհրդակցություն չէր հրավիրվել:
Սեպտեմբերի 24-ի գիշերը ՆԳՆ-ն հայտնել էր Գրիգորյանի և քրեական ոստիկան Կարեն Աբրահամյանի սպանության, ինչպես նաև քաղաքացի Արծրուն Գալստյանի վիրավորվելու մասին: Գրիգորյանը Փարաքարի ղեկավար էր ընտրվել մարտին կայացած ընտրությունների արդյունքներով։ Նա առաջադրվել էր ընդդիմադիր «Միասնություն» դաշինքից, որի կազմում էին «Ապրելու երկիր» և «Հաղթանակ» կուսակցությունները։ Քաղաքական ուժերը, գործիչները դատապարտել են այդ միջադեպը:
