Գլխավոր դատախազ Աննա Վարդապետյանն ԱԺ պատգամավոր Հովիկ Աղազարյանի նկատմամբ քրեական հետապնդում հարուցելուն համաձայնություն տալու միջնորդություն է ներկայացրել։ Վարդապետյանը ներկայացրել է գործի մանրամասները և նշել, որ պատգամավորին մեղադրանք է առաջադրվել երկու քրեական հանցագործության համար։
Գլխավոր դատախազի խոսքով՝ առաջին դրվագով Աղազարյանը մեղադրվում է կեղծ փաստաթղթերի միջոցով մանր եղջերավոր անասունների արտահանման կազմակերպմանն աջակցելու մեջ։ Պատգամավորը, իրավապահների տվյալներով, ձեռնարկատերերից 200-300 հազար դոլար է պահանջել՝ օրենքի խախտմամբ ԱՄԷ 150-200 գլուխ գյուղատնտեսական կենդանիների խմբաքանակի արտահանումը կազմակերպելու համար։
Ըստ դատախազության՝ «կաշառատուն» Աղազարյանի հետ հանդիպել է ԱԺ վարչական շենքի մոտ և հայտնել նրան, որ հանդիպել է պաշտոնատար անձանց հետ և պայմանավորվածություններ ձեռք բերել։ Ըստ գործի նյութերի՝ գործընթացն սկսելու համար Աղազարյանը 100 հազար դոլար է պահանջել՝ նշելով, որ դրա դիմաց անսահմանափակ քանակությամբ կենդանիներ կարող են արտահանել։ Իսկ գումարի մյուս մասը՝ ևս 100 հազար դոլար, Աղազարյանը պետք է ստանար գործարքի մեկնարկից հետո։
Դատախազը հայտնել է, որ հաջորդ օրը կաշառատուները 20 հազար դոլար են բերել Աղազարյանին՝ խոստանալով կենդանիների ամեն խմբաքանակի հետ մնացած գումարը վճարել, սակայն Աղազարյանը վրդովվել է ու չի վերցրել նշված գումարը։
Գործի երկրորդ դրվագում Աղազարյանին մեղադրում են «ԷկոՍիթի» ընկերության ղեկավար, գործարար Արամ Մկրտչյանից 23 հազար դոլար և 300 հազար դրամ կաշառք պահանջելու մեջ՝ Աջափնյակում կիսավեր դպրոցի շենքը քանդելու և տարածքի մի մասը բազմաբնակարան շենքի կառուցման համար թույլտվություն ստանալուն աջակցելու համար։ Ըստ Վարդապետյանի՝ Աղազարյանը չի կարողացել կազմակերպել գործընթացը, սակայն գումարը կաշառատուին չի վերադարձրել։ Վարդապետյանն ընդգծել է, որ գործին կցվել են անհրաժեշտ տեսաձայնագրությունները։
ՀՀ վարչապետ Նիկոլ Փաշինյանն Աղազարյանին խնդրել էր մանդատը վայր դնել 2024 թվականի հոկտեմբերի 15-ին՝ Քննչական կոմիտեի նախկին նախագահ Արգիշտի Քյարամյանի հետ ունեցած վիճաբանությունից հետո: Դեկտեմբերի 2-ին Աղազարյանը հայտարարել էր մանդատը վայր դնելու վարչապետի խնդրանքը մերժելու մասին։ Դեկտեմբերի 3-ին ՔՊ վարչության նիստում որոշում էր կայացվել Աղազարյանին հեռացնել կուսակցությունից, իսկ դեկտեմբերի 4-ին նա հայտարարել էր ՔՊ խմբակցությունից դուրս գալու մասին։
Հակակոռուպցիոն կոմիտեն առգրավել էր պատգամավորի հեռախոսը քրեական վարույթի շրջանակներում, որով անցնում էր որպես վկա։ Փաշինյանը հայտարարել էր, որ «Աղազարյանի հեռախոսը վերցնելուց հետո բացահայտել են պետական անվտանգության սպառնալիքներ պարունակող տեղեկություններ, այդ թվում՝ հակահետախուզական սպառնալիքներ»։
Դեկտեմբերի 9-ին դատախազությունն Աղազարյանի կողմից արտահոսքեր կազմակերպելու հրապարակումն ուղարկել էր Հակակոռուպցիոն կոմիտե։ Դեկտեմբերի 10-ին Աղազարյանը դիմել էր ՀՀ գլխավոր դատախազություն՝ պահանջելով պարզաբանել, թե ինչպե՞ս են իր անձնական տվյալները հայտնվել երրորդ անձանց մոտ։
Փետրվարի 8-ին «Միացյալ ազգային սահմանադրական կուսակցության» հիմնադիր համագումարում Աղազարյանը հայտարարել էր, որ մտադիր է պայքարել կուսակցության հետ՝ 2026 թվականին կայանալիք խորհրդարանական ընտրություններում վարչապետի չվերընտրվելու համար։ Նա չէր բացառել, որ պայքարը կշարունակվի ոչ միայն մինչև 2026 թվականի խորհրդարանական ընտրությունները, այլև հնարավոր արտահերթ ընտրությունների դեպքում։
