Գլխավոր դատախազ Աննա Վարդապետյանը մայիսի 6-ին հանրային քրեական հետապնդում է հարուցել 19-ամյա վարորդի (Վ. Մարկոսյան- խմբ) նկատմամբ, Armenia Today-ը տեղեկացել է Գլխավոր դատախազությունից։
Ըստ գերատեսչության՝ քրեական հետապնդումը հարուցվել է Քրեական օրենսգրքի 342-րդ հոդվածի 1-ին մասով (ճանապարհային երթևեկության անվտանգության կանոնները խախտելը, առավելագույն պատիժը՝ 3 տարվա ազատազրկում), 297-րդ հոդվածի 2-րդ մասի 3-րդ կետով (խուլիգանություն, առավելագույն պատիժը՝ 5 տարվա ազատազրկում) և 344-րդ հոդվածի 1-ին մասով (տրանսպորտային միջոցներ վարելու իրավունքից զրկված անձի կողմից տրանսպորտային միջոցներ վարելը, առավելագույն պատիժը՝ 2 տարվա ազատազրկում) :
Ավելի ուշ ՔԿ-ն հայտնել է, որ Մարկոսյանի նկատմամբ կալանքը որպես խափանման միջոց կիրառելու վերաբերյալ միջնորդություն է ներկայացվել դատարան։
Shamshyan.com-ն ապրիլի 23-ին հրապարակել էր տեսանյութ, որում երևում էր, որ Մարկոսյանը մտածված գերազանցում է ավտոմեքենայի արագությունը։ Նա տեսանկարահանել էր արագությունը գերազանցելու պահը՝ ասելով, թե ինչ-որ մեքենայի հիմա կնվաստացնի, ինչն ավարտվել էր ավտովթարով։
Մայիսի 5-ին ՔԿ-ն հայտնել էր, որ ապրիլի 23-ին նախաձեռնվել է քրեական վարույթ՝ Քրեական օրենսգրքի 342-րդ հոդվածի 1-ին մասով և 344-րդ հոդվածի 1-ին մասով:
