Մանկաբարձ-գինեկոլոգ Մհեր Ադամյանը, որը ծնունդ էր ընդունում Կամչատկայում տեղի ունեցած երկրաշարժի ժամանակ, Armenia Today-ին տված բացառիկ հարցազրույցում պատմել է, թե ինչպես է հայտնվել այդ հեռավոր շրջանում և ինչպես պետք է բժիշկներն արձագանքեն արտակարգ իրավիճակների պայմաններում։
Ադամյանի խոսքով՝ ինքն ընտանիքի հետ 2011 թվականին տեղափոխվել է Կամչատկա հայրենադարձության ծրագրի շրջանակում։ Տեղում ավարտել է դպրոցը, ապա ընդունվել է Խաղաղօվկիանոսյան պետական բժշկական համալսարան՝ նպատակային ծրագրով։ Այնուհետև անցել է օրդինատուրա Մոսկվայում և վերադարձել Կամչատկայի մարզային ծննդատուն՝ որպես մանկաբարձ-գինեկոլոգ։
Նրա խոսքով՝ երկրաշարժերը տարածաշրջանում սովորական երևույթ են։ Բայց այս վերջինը՝ (Ռիխտերի սանդղակով՝ 8,7 մագնիտուդով- AT)՝ դեռ շարունակում է հետցնցումներով ուղեկցվել՝ մոտավորապես յուրաքանչյուր 30-40 րոպեն մեկ։
Այնուամենայնիվ, ըստ Ադամյանի, հաջողվել է լիովին խուսափել վտանգից։
«Երբ սկսվեց ցնցումը, ես գտնվում էի վերևի հարկերից մեկում։ Անմիջապես հավաքեցի հղիներին ու նորածիններին և տեղափոխեցի անվտանգ գոտի, մեր ծննդատանը դրանք նախանշված են։ Ցնցումներից հետո սկսեցինք տարհանումը։ Շրջեցինք բոլոր հարկերով՝ համոզվելու, որ բոլորը դուրս են եկել։ Հետո վերադարձա ծնարան և շարունակեցի ծնունդ ընդունել։ Կնոջն այդ ամբողջ ընթացքում հետևում էր մանկաբարձուհին»,- պատմել է նա։
Ադամյանը նշել է, որ երկրաշարժի ընթացքում ծնունդ ընդունելու համար առանձին բժշկական արձանագրություն գոյություն չունի, ամեն ինչ որոշվում է իրավիճակից ելնելով՝ անվտանգության կանոնների պահպանմամբ։
Նորածնի մոր վիճակի մասին լրագրողի հարցին Ադամյանը պատասխանել է, որ նա դեռ գտնվում է բաժանմունքում, սակայն առանց նրա համաձայնության այլ մանրամասներ չի կարող հաղորդել։
Մհերն ընտանիքի հետ կապ հաստատել է միայն այն ժամանակ, երբ ծնունդ ընդունելն ավարտել է։
«Երկրաշարժի պահին նույնիսկ չեմ հիշում՝ հեռախոսս որտեղ էր։ Բայց, փառք Աստծո, ընտանիքիս հետ ամեն ինչ կարգին է»,- ասել է նա։
Ավելի վաղ Известия-ին տված հարցազրույցում Ադամյանը նշել էր, որ իրեն հերոս չի համարում՝ երկրաշարժի պահին ծնունդ ընդունելը որակելով որպես «սովորական աշխատանք»։ Նա ասել էր, որ ինքը և իր գործընկերներն անքուն հերթապահում էին՝ անհրաժեշտության դեպքում արագորեն հիվանդներին տարհանելու պատրաստ։
