Կառավարությունը մերժել է եկամուտների համընդհանուր հայտարարագրման համակարգը վերացնելու օրինագիծը։ Որոշումն ընդունվել է կառավարության՝ մարտի 13-ի նիստում։ Օրինագծի հեղինակն ԱԺ «Հայաստան» խմբակցության պատգամավոր Թադևոս Ավետիսյանն է։
Նախագծում ասված է, որ Ֆինանսների նախարարությունը եկամուտների հայտարարագրման համակարգի չեղարկման առաջարկությունն սկզբունքորեն անընդունելի է համարում։
Կառավարությունում համոզված են, որ ԱԺ «Հայաստան» խմբակցության առաջարկն իրավիճակի խորքային վերլուծության և խնդիրների վերհանման չի ենթարկվել, այլ միայն ներկայացրել է ապագայում առաջացող հնարավոր խնդիրների վերլուծություն։
Կառավարությունում համաձայն չեն խմբակցության այն պնդման հետ, որ հայտարարագրման համակարգը դժվարություններ է առաջացնում քաղաքացիների որոշ շրջանակի համար և դրա ընդունմանը քաղաքացիները պատրաստ չեն, և տեղեկացրել են, որ ընթացակարգը շարունակաբար պարզեցնելու ու բարելավելու ուղղությամբ աշխատանքներ են իրականացվում։
Կառավարությունը նաև մերժել է այն պնդումը, որ հայտարարագիրն ուղղված է բյուջեի եկամուտների ավելացմանը և շեշտել, որ հայտարարագրի ներդրումը նպաստելու է ստվերային եկամուտները հաշվարկելուն: Գործադիրից հիշեցրել են, որ այդ եկամուտներից առաջացած հարկերը հետ ստանալու հնարավորություն է ստեղծված «սոցիալական կրեդիտների» համակարգի տեսքով:
Կառավարության եզրակացության մեջ ասված է, որ ընդդիմության առաջարկը չի բխում 2021-2026 թվականների «Հարկաբյուջետային քաղաքականություն»-ից, որը կնպաստի նաև միջազգային պրակտիկայում լայնորեն կիրառվող «սոցիալական կրեդիտների» համակարգի ներդրմանը:
Հայաստանում 2023 թվականին ներդրվել էր եկամուտների համընդհանուր հայտարարագրման համակարգ։ 2025 թվականին 2024 թվականի հաշվետու տարվա համար եկամուտների հայտարարագիր պետք է ներկայացնեն այն նոր խմբերը, որոնք 2024 թվականի ընթացքում համարվել են վարձու աշխատող, ինչպես նաև 2024-ի ընթացքում քաղաքացիաիրավական պայմանագրերի շրջանակում ստացել են հարկվող եկամուտ։
2024 թվականի համար ֆիզիկական անձինք եկամուտների հայտարարագիր պետք է ներկայացնեն էլեկտրոնային եղանակով։ Նախքան հայտարարագիր ներկայացնելը, առաջին հերթին, պարտադիր է իրականացնել անձի նույնականացում և ձեռք բերել էլեկտրոնային ստորագրություն: Անձի նույնականացման համար անհրաժեշտ է ունենալ նույնականացման ID քարտ։
