ՀՀ Կառավարությունն այսօր՝ հուլիսի 2-ին, տեղի ունեցած նիստում փոփոխություններ և լրացումներ կատարեց կառավարության 2018 թվականի հուլիսի 19-ի N 893-Լ որոշման մեջ։
Կառավարության որոշման մեջ փոփոխությունների կատարումը պայմանավորված է հանրապետությունում պարտադիր սպանդանոցային մորթի անցումը կազմակերպելու համար սպանդանոցային ցանցն ընդլայնելու, մասնավորապես՝ Էկոնոմիկայի նախարարության կողմից թիրախավորված համայնքներում շարժական մոդուլային սպանդանոցներ տեղակայելու նպատակով տնտեսավարողներին պետական օժանդակություն ցուցաբերելու անհրաժեշտությամբ:
Ծրագիրը մեկնարկել է 2018 թվականի հուլիս ամսից, որի հիմնական նպատակը` ագրոպարենային ոլորտի տնտեսավարողներին մատչելի պայմաններով, մասնավորապես՝ ֆինանսական վարձակալության մեխանիզմների կիրառմամբ սարքավորումների մատակարարումն է:
Ծրագրի մեկնարկից սկսած 2020 թվականի ապրիլի 30-ի դրությամբ առևտրային բանկերի կողմից հաստատվել է լիզինգի տրամադրման 133 հայտ՝ շուրջ 2949.7 մլն դրամի չափով, սուբսիդավորման գումարը կազմել է 104.1 մլն դրամ, իսկ ձեռք բերված սարքավորումների քանակը՝ 451 միավոր։
Այս նախագծով առաջարկվում է Էկոնոմիկայի նախարարության կողմից քարտեզագրված սպանդանոցային ցանցի թիրախավորված համայնքներում շարժական մոդուլային սպանդանոցներ տեղակայելու նպատակով ձեռքբերվող սարքավորումների լիզինգի համար անհրաժեշտ 20 տոկոս կանխավճարի 15 տոկոսը, բայց ոչ ավելի, քան 4.8 մլն դրամը սուբսիդավորվել։
Էկոնոմիկայի նախարարությունը դիմումը մուտքագրելուց հետո հինգ աշխատանքային օրվա ընթացքում դիմումատուին տրամադրում է գրավոր պատասխան համաձայնության կամ մերժման մասին:
