Հայաստանում շինարարության ծավալները 2024 թվականի 11 ամիսների համեմատ 2025-ի 11 ամսիներին ավելի քան 20%-ով աճել են, հայտնել է ՀՀ քաղաքաշինության կոմիտեի նախագահ Եղիազար Վարդանյանը։ Ասուլիսը հեռարձակվել է Armenia Today-ի Youtube-ի ալիքում։
Նա նշել է, որ քաղաքաշինության կոմիտեն 2025 թվականի ընթացքում համակարգել է 101 շինարարական և շուրջ 70 նախագծային ծրագիր։ Շինարարություն է կատարվել 645 մլրդ դրամ ծավալով։
Վարդանյանը, անդրադառնալով Երևանում օդի աղտոտվածության խնդրին, հայտնել է, որ կոմիտեն կառուցապատողներին մինչև մայիս ժամանակ է տվել շինհրապարակները վերակահավորելու համար։
«Չորս ամիս՝ բավարար ժամկետ ենք տվել կառուցապատողներին, որպեսզի պատշաճ ժամանակ ունենան իրենց շինհրապարակները վերակահավորելու համար։ Այդ աշխատանքը հիմնականում կապված է շատ մեծ գումարի հետ։ Նրանք պետք է բետոնապատեն այն հատվածները, որտեղ շինարարությունն սպասարկելու տրանսպորտային միջոցներն են երթևեկում, որպեսզի քամիների ժամանակ այդ հողային մակերեսից փոշին դուրս չգա»,- հստակեցրել է նա։
Վարդանյանը նաև տեղեկացրել է, որ պարտադիր պահանջ են սահմանել, որ շինհրապարակները կահավորված լինեն այն սարքավորումներով, որոնք վերլուծելու են և գնահատական են տալու օդի աղտոտվածության մակարդակի մասին։ Նա հավելել է, որ շինհրապարակներում պետք է տեղադրված լինեն նաև ջրային մառախուղ առաջացնող համապատասխան սարքավորումներ, որ փոշու արտանետումները դեպի մթնոլորտ նվազեցվի։
Քաղաքաշինության կոմիտեի նախագահը հայտարարել է նաև, որ մտադիր են Երևանում ռենովացիոն ծրագիր իրականացնել։ Այս փուլում քննարկում են ծրագրի հնարավոր մոդելները։ Նա հստակեցրել է, որ խոսքը հին շենքերը քանդելու, ապամոնտաժելու և դրանց փոխարեն նոր շենք կառուցելու մասին է։
«Մեր գլխավոր նպատակը պետք է լինի տարիներ կամ տասնամյակներ հետո հասնել այն մակարդակի, որ բնակարանային ֆոնդի գոնե մեծ մասը համապատասխանի սեյսմիկ պահանջներին։ Որպես հեռանկար՝ ենթադրվում է ռենովացիոն ծրագրերի իրականացում։ Հիմա ծրագրի տարբեր մոդելներն ենք քննարկում, որպեսզի գտնենք լավագույնը, որը կիրառելի է այսօրվա մեր հնարավորություններով և համապատասխանում է ներկայիս շուկայի պահանջներին»,- հավելել է նա։
Վարդանյանը նաև հայտնել է, որ շինարարական բոլոր կազմակերպությունները երեք ամիսը վարկանիշավորվելու են, վարկանիշի հիմք են լինելու նախորդ երեք տարվա ընթացքում թույլ տրված խախտումները։
Դիտեք նաև՝
«Խեղդվում ենք, օդ չկա շնչելու», «աղտոտվածություն չենք նկատում». հարցում՝ Երևանում օդի որակի մասին
