ՀՀ ՊՆ պաշտպանական ազգային հետազոտական համալսարանի և Վրաստանի ՊՆ պաշտպանական հաստատությունների զարգացման դպրոցի միջև ստորագրվել է համագործակցության հուշագիր, հայտնել է ՊՆ-ն։
Ըստ հայտարարության՝ Վրաստանի ՊՆ պաշտպանական հաստատությունների զարգացման դպրոցի «Պաշտպանություն և անվտանգություն ավագ ծրագրի» ունկնդիրները և ղեկավար կազմը՝ կրթօջախի տնօրենի տեղակալ Նիկոլոզ Մելկաձեի գլխավորությամբ, Հայաստան են ժամանել դեկտեմբերի 23-24-ը:
ՊՆ-ում նրանց ընդունել է ՀՀ ՊՆ պաշտպանական քաղաքականության և միջազգային համագործակցության վարչության պետ Լևոն Այվազյանը, նշել են գերատեսչությունից։
Հանդիպման ընթացքում ներկայացվել են ՀՀ պաշտպանության ոլորտում իրականացվող վերափոխումների գործընթացը, ինչպես նաև պաշտպանության բնագավառում Հայաստանի և Վրաստանի համագործակցության հեռանկարները։
Հունվարի 26-ին Հայաստանի վարչապետ Նիկոլ Փաշինյանը և Վրաստանի նախկին վարչապետ Իրակլի Ղարիբաշվիլին Թբիլիսիում ստորագրել էին ռազմավարական գործընկերության համաձայնագիր։ Փաշինյանը համաձայնագիրն անվանել էր Երևանի և Թբիլիսիի վերջին տարիների «ձեռքբերում»։ Կողմերը պայմանավորվել էին գործնական քայլեր ձեռնարկել հայ-վրացական սահմանի սահմանազատման ուղղությամբ։ Հուլիսի 12-ին Հայաստանի և Վրաստանի պաշտպանության նախարարության ղեկավարները ստորագրել էին պաշտպանական համագործակցության պլանը։