Ռազմաուսումնական հաստատություններ ավարտած պայմանագրային զինծառայողները կհամարվեն ատեստավորված, նախագիծը դրական եզրակացություն է ստացել ԱԺ պաշտպանության և անվտանգության հարցերի մշտական հանձնաժողովում, այն կքննարկվի ԱԺ առաջիկա նիստերի ընթացքում:
ՀՀ պաշտպանության նախարար Սուրեն Պապիկյանը հայտնել է, որ նախագծով վերանայվում են պայմանագրային զինծառայողների պարտադիր ատեստավորման դեպքերը։
Մասնավորապես, նրա խոսքով, «Պաշտպան հայրենյաց» ծրագրով ծառայություն անցնող զինծառայողներն ատեստավորված կհամարվեն ուսումնական փուլի ավարտին հանձնվող քննությունների արդյունքներով՝ պայմանով, որ նրանք նշանակվել են ստացած զինվորական մասնագիտությանը համապատասխան պաշտոնի։ ՀՀ ռազմաուսումնական հաստատություններն ավարտած և համապատասխան սպայական պաշտոնի նշանակված զինծառայողներն ատեստավորված կհամարվեն ավարտական քննությունների արդյունքներով։ Երկու դեպքում էլ հավելավճարը կհաշվարկվի պաշտոնի նշանակման օրվանից։
Նախարարի խոսքով՝ նախաձեռնության նպատակը նաև «Պաշտպան հայրենյաց» ծրագրով ծառայություն անցնող զինծառայողների համար պայմանագրային ծառայությունը շարունակելու գրավչության բարձրացումն է։
ԱԺ-ն փետրվարի 11-ի նիստում առաջին ընթերմամբ ընդունեց նախագիծը, որով ռազմաուսումնական հաստատություններ ավարտած պայմանագրային զինծառայողները կհամարվեն ատեստավորված։
Նախագիծն ընդունվեց 66 կողմ, 0 դեմ և 25 ձեռնպահ ձայներով։
Կարդացեք նաև՝
Ո՞ր զինծառայողները կհամարվեն ատեստավորված. ի՞նչ քննություն է սպասվում. Պապիկյանի պարզաբանումը
Նյութը թարմացվել է փետրվարի 11-ին։
