Միացյալ Նահանգները զորքեր չի տեղակայի Ուկրաինայում՝ անվտանգության երաշխիքներ տրամադրելու շրջանակներում, հայտարարել է Սպիտակ տան մամուլի քարտուղար Քերոլայն Լևիտը։
«Ամերիկյան զորքերը չեն տեղակայվի Ուկրաինայի տարածքում, բայց մենք, անշուշտ, կարող ենք օգնել համակարգման հարցում և, հնարավոր է, կտրամադրենք մեր եվրոպացի դաշնակիցների անվտանգությունն ապահովելու այլ միջոցներ»,- ասել է նա ճեպազրույցի ժամանակ։
Լևիտը նաև հայտարարել է, որ ԱՄՆ-ն Ռուսաստանի հետ կքննարկի Ուկրաինայի համար ընդունելի անվտանգության երաշխիքներ։ Նա նշել է, որ ԱՄՆ նախագահ Դոնալդ Թրամփը քննարկում է այս թեման և՛ Ռուսաստանի, և՛ Ուկրաինայի հետ։
«Նա իր թիմին հանձնարարել է մշակել անվտանգության երաշխիքների նախագիծ, որը կլինի ընդունելի՝ երկարաժամկետ խաղաղություն ապահովելու և այս հակամարտությունը դադարեցնելու համար»,- նշել է Լևիտը։
ՌԴ նախագահ Վլադիմիր Պուտինը և ԱՄՆ նախագահը բանակցություններ էին վարել օգոստոսի 16-ի գիշերը։ Հանդիպումից հետո կողմերը, մասնավորապես, հայտարարել էին, որ համաձայնության են եկել Ուկրաինայի վերաբերյալ որոշ կետերի շուրջ, բայց մի շարք հարցերի առումով դեռևս համաձայնություն չկա։ Պուտինը շեշտել էր, որ առճակատման ժամանակն անցել է, և Թրամփին հրավիրել էր Մոսկվա։
Օգոստոսի 18-ին Թրամփը Սպիտակ տանը հանդիպել էր Ուկրաինայի նախագահ Վլադիմիր Զելենսկու հետ։ Զելենսկին հայտարարել էր, որ ԱՄՆ-ից զենքի գնումը կլինի Ուկրաինայի անվտանգության երաշխիքների մի մասը։
