Չեչնիայի ոստիկանությունը հետաքննություն է անցկացնում Մոսկվայում առևանգված հայ գործարար Արեգ Շչեպիխինի գործով, ասված է Չեչնիայի Հանրապետության ազգային քաղաքականության, արտաքին հարաբերությունների, մամուլի և տեղեկատվության նախարար Ահմեդ Դուդաևի հայտարարության մեջ։
Չեչնիայի իշխանությունները պնդում են, որ գործարարը չի առևանգվել, այլ «ձերբակալվել է իրավապահ մարմինների աշխատակիցների կողմից»։
Դուդաևը հայտարարել է, որ հետաքննություն է ընթանում Շչեպիխինի «հրապարակային գործողությունների վերաբերյալ, որոնք ուղղված են հավատացյալների կրոնական զգացմունքները վիրավորելուն և մի խումբ մարդկանց արժանապատվությունը նվաստացնելուն՝ հիմնվելով նրանց ազգային և կրոնական պատկանելության վրա»։
Նախարարը պնդում է, որ Շչեպիխինը «բազմիցս կոչ է արել էթնիկ զտումների, արտահայտել է նացիստական հայացքներ, վիրավորել է կրոնը և Աստծուն, ինչպես նաև արել է ծայրահեղական բնույթի հայտարարություններ, այդ թվում՝ երեխաների նկատմամբ սեռական բռնության սպառնալիքներ»։
Միևնույն ժամանակ, «Բազա» Telegram ալիքը հրապարակել է Շչեպիխինի ազատության մեջ լինելն ապացուցող լուսանկարը: Լրատվականը պնդում է, որ առևանգումից հետո նրան ստիպել են «ներողություն խնդրելու» տեսանյութ նկարահանել և մեղադրել են Ուկրաինայի հետ կապեր ունենալու մեջ:
Հունիսի 3-ին Մոսկվայի կենտրոնում՝ Յարոսլավսկի երկաթուղային կայարանի մոտ, մի քանի անձ բռնի ուժով հայ գործարարին թարթող լույսերով մեքենայի բեռնախցիկ էր նստեցրել և առևանգել: Տղամարդն օգնություն էր կանչել և խնդրել ոստիկանություն զանգահարել: Միջադեպի տեսանյութը հայտնվել էր ռուսական Telegram ալիքներում:
