ԱԺ պատգամավոր Հովիկ Աղազարյանն Ազգային ժողովում հայտարարել է, որ իր նկատմամբ քաղաքական ճնշում կա։ Պատգամավորն այսպես է արձագանքել իր դեմ հարուցված քրեական գործին։
Այսօր ավելի վաղ ՀՀ գլխավոր դատախազ Աննա Վարդապետյանն Աղազարյանի նկատմամբ քրեական հետապնդում հարուցելուն համաձայնություն տալու միջնորդություն էր ներկայացրել ԱԺ։ Վարդապետյանը նշել էր, որ պատգամավորին մեղադրանք է առաջադրվել երկու քրեական հանցագործության համար։
Գլխավոր դատախազի խոսքով՝ առաջին դրվագով Աղազարյանը մեղադրվում է կեղծ փաստաթղթերի միջոցով մանր եղջերավոր անասունների արտահանման կազմակերպմանն աջակցելու մեջ։ Գործի երկրորդ դրվագում Աղազարյանն «ԷկոՍիթի» ընկերության ղեկավար, գործարար Արամ Մկրտչյանից 23 հազար դոլար և 300 հազար դրամ կաշառք է պահանջել՝ Աջափնյակում կիսավեր դպրոցի շենքը քանդելու և տարածքի մի մասը բազմաբնակարան շենքի կառուցման համար թույլտվություն ստանալուն աջակցելու համար։
ԱԺ-ում Աղազարյանը նշել է, որ գործից մաս անջատելու արդյունքում կորցրել է պաշտպանվելու հնարավորությունը։
«Հիմա ասում են՝ ինչո՞ւ եք քննադատում վարչապետ Նիկոլ Փաշինյանին, հայտնի դեպքերից հետո սկսեցիք քննադատել։ Ասեմ, որ միշտ էլ այն հարթակներում, որտեղ կարելի էր, քննադատել եմ, սակայն թիմային տրամաբանությունից ելնելով՝ չեմ հրապարակել»,- ասել է Աղազարյանը։
Նա հավելել է, որ վարչապետին թվացել է, թե իր համեստ կերպարով Աղազարյանը կարող է որոշակի անհարմարություններ առաջացնել, ուստի ընտրել է պատգամավորին մեկուսացնելու, քաղաքականությունից հեռացնելու ճանապարհը։
«Եթե դա է խաղաղության պայմանագրի և դրա հետ կապված հետագա գործողությունների գինը, ես պատրաստ եմ վճարել»,- եզրափակել է Աղազարյանը։
Փաշինյանն Աղազարյանին խնդրել էր մանդատը վայր դնել 2024 թվականի հոկտեմբերի 15-ին՝ Քննչական կոմիտեի նախկին նախագահ Արգիշտի Քյարամյանի հետ ունեցած վիճաբանությունից հետո: Դեկտեմբերի 2-ին Աղազարյանը հայտարարել էր մանդատը վայր դնելու վարչապետի խնդրանքը մերժելու մասին։ Դեկտեմբերի 3-ին ՔՊ վարչության նիստում որոշում էր կայացվել Աղազարյանին հեռացնել կուսակցությունից, իսկ դեկտեմբերի 4-ին նա հայտարարել էր ՔՊ խմբակցությունից դուրս գալու մասին։
Հակակոռուպցիոն կոմիտեն առգրավել էր պատգամավորի հեռախոսը քրեական վարույթի շրջանակներում, որով անցնում էր որպես վկա։ Փաշինյանը հայտարարել էր, որ «Աղազարյանի հեռախոսը վերցնելուց հետո բացահայտել են պետական անվտանգության սպառնալիքներ պարունակող տեղեկություններ, այդ թվում՝ հակահետախուզական սպառնալիքներ»։
Դեկտեմբերի 9-ին դատախազությունն Աղազարյանի կողմից արտահոսքեր կազմակերպելու հրապարակումն ուղարկել էր Հակակոռուպցիոն կոմիտե։ Դեկտեմբերի 10-ին Աղազարյանը դիմել էր ՀՀ գլխավոր դատախազություն՝ պահանջելով պարզաբանել, թե ինչպե՞ս են իր անձնական տվյալները հայտնվել երրորդ անձանց մոտ։
Փետրվարի 8-ին «Միացյալ ազգային սահմանադրական կուսակցության» հիմնադիր համագումարում Աղազարյանը հայտարարել էր, որ մտադիր է պայքարել կուսակցության հետ՝ 2026 թվականին կայանալիք խորհրդարանական ընտրություններում վարչապետի չվերընտրվելու համար։ Նա չէր բացառել, որ պայքարը կշարունակվի ոչ միայն մինչև 2026 թվականի խորհրդարանական ընտրությունները, այլև հնարավոր արտահերթ ընտրությունների դեպքում։
