ԱԺ պատգամավոր Հովիկ Աղազարյանը Armenia Today-ին պատմել է գործող վարչապետի վերընտրվելուն հակադրվելու ծրագրերի և ընդդիմադիր այլ ուժերի հետ հնարավոր նախընտրական դաշինքների մասին։
2024 թվականի հոկտեմբերին իշխող «Քաղաքացիական պայմանագիր» (ՔՊ) կուսակցությունը Աղազարյանին հեռացրել էր իր շարքերից այն բանից հետո, երբ վերջինս հրաժարվել էր վարչապետ Նիկոլ Փաշինյանի պահանջով վայր դնել իր մանդատը։ Փետրվարին Աղազարյանն ու ՔՊ-ից հեռացված պատգամավոր Հակոբ Ասլանյանը ստեղծել էին Միացյալ ազգային սահմանադրական կուսակցությունը։
2026 թվականի խորհրդարանական ընտրություններում Փաշինյանի վերընտրվելու դեմ պայքարի մասին
Աղազարյանը հայտարարեց, որ ՄԱՍԿ-ը պետք է երկու ուղերձով ներկայանա քաղաքացիներին։
«Ուղերձներից մեկն այն է, որ մենք նպատակահարմար չենք գտնում, որ վարչապետը նորից դառնա մեր կառավարության ղեկավարը, և երկրորդ՝ մեր ծրագրով ներկայանալու ենք ժողովրդին՝ ինչպես կուսակցություն, այնպես էլ նախընտրական ծրագրով»,- ասաց պատգամավորը։
Աղազարյանը նշեց, որ իշխանություններն ամենուր կոռումպացնում են իշխող թիմին և նրա անդամներին, ինչի պատճառով շատ ժողովրդավարական երկրներում պետության ղեկավարը երկու ժամկետից ավելի չի ընտրվում։ Պատգամավորը հիշեցրեց, որ Փաշինյանը պետությունը ղեկավարում է 8 տարի, այսինքն՝ արդեն երկու ժամկետ։
«Եթե Փաշինյանը վերընտրվի, նա անխուսափելիորեն կվերածվի ավտորիտար ղեկավար, և դա մեզ համար անընդունելի է»,- ասաց նա։
Բացի այդ, ըստ պատգամավորի, վարչապետն իր իշխանության օրոք «վատնել է հսկայական ռեսուրսներ՝ մարդկային, ֆիզիկական, հոգևոր»։ Աղազարյանը կարծիք հայտնեց, որ Փաշինյանը «այս առումով էլ իրեն սպառել է», և այդ պատճառով նա չպետք է լինի երկրի ղեկավարը։
ՔՊ-ն մերժել է «կարևոր և հեղափոխական» առաջարկները
Աղազարյանը խոսել է նաև «կարևոր և հեղափոխական» առաջարկների մասին, որոնք նախկինում հայտարարել էր, որ նախատեսում է իրականացնել իր կուսակցության գործունեության շրջանակներում, և որոնք նախկինում մերժվել էին իշխող կուսակցության կողմից։ Պատգամավորի խոսքով՝ դեռ ՔՊ-ի իշխանության գալուց առաջ նա առաջարկել է կոռուպցիայի դեմ պայքարի շրջանակում կոռուպցիայի կանխարգելման հանձնաժողովը փոխանցել ընդդիմությանը։ Աղազարյանը պարզաբանել էր, որ հանձնաժողովում պետք է լիներ իշխանության մեկ ներկայացուցիչ։ Պատգամավորն ասաց, որ չնայած կուսակցությունում ի սկզբանե այդ գաղափարը լավ ընդունվեց, ՔՊ իշխանության գալուն պես կուսակցությունը «մտափոխվեց»։ Սա, ըստ պատգամավորի, նշանակում է կոռուպցիայի դեմ ընտրովի պայքար։
Որպես երկրորդ գաղափար՝ պատգամավորը մատնանշեց Հայաստանում երկպալատ խորհրդարան ստեղծելու առաջարկը։ Գաղափարը, նրա խոսքով, վերին պալատի ստեղծումն էր, որը բաղկացած կլինի աշխարհի բոլոր հայերից: Պալատը կունենա որոշակի լիազորություններ «այնքանով, որքանով դա թույլատրվում է Հայաստանի սահմանադրությամբ և միջազգային իրավունքով»։ Նշելով, որ պալատի ձևավորման նման տարբերակը կարող է իրավական միջպետական խնդիրներ առաջացնել, Աղազարյանը կարծիք հայտնեց, որ դրանք լուծելի կլինեն։ Նրա խոսքով՝ այս առաջարկը սկզբում ներառվել է կուսակցության նախընտրական ծրագրում, սակայն հետո ՔՊ-ն մտափոխվել է։
Վարչապետ Փաշինյանի հրաժարականի գործընթաց սկսելու ծրագրերի մասին
Պատասխանելով մամուլում հայտնված այն հարցին, թե առաջիկայում Փաշինյանի հրաժարականի գործընթացը սկսելու մտադրության ունի՝ Աղազարյանն ասաց, որ այս հարցում «շատ նուրբ պահեր» կան։
«Չեմ ուզում խոսել այս թեմայի մասին, որովհետև այնտեղ շատ նուրբ շերտեր կան։ Չեմ կարծում, որ դա նպատակահարմար է, քանի որ ապագայում գործընթացներ կան։ Ես չեմ ցանկանում, որ դրանք տեղի ունենան, և, հետևաբար, տեղին չեմ համարում բացահայտել մեր զինանոցը»,- ասաց նա։
Ընտրական դաշինքի ձևավորման հնարավորության և ընդդիմադիր ուժերի հետ համագործակցության մասին
«Մենք հստակ ասել ենք, որ չենք համագործակցելու Ռոբերտ Քոչարյան-Սերժ Սարգսյան առանցքի շուրջ համախմբված քաղաքական ուժերի հետ։ Սա մեզ համար հաստատ է: Մենք չենք համագործակցի մի ուժի հետ, որը կուզենա, որ Փաշինյանը լինի վարչապետ։ Մենք նախ պետք է վաստակենք ժողովրդի քվեն, մտնենք Ազգային ժողով, հետո մեր մանդատի համաձայն մեր դիրքորոշումը կցուցաբերենք»,- պարզաբանեց Աղազարյանը։
Պատգամավորն ասաց, որ իր կուսակցությունն արդեն համագործակցում է որոշ ընդդիմադիր ուժերի հետ։
«Նման ուժեր կան, և նրանց հետ համագործակցության դրսևորումը նկատելի կդառնա առաջիկա 3-4 օրվա ընթացքում»,- ասաց նա։
Աղազարյանը հայտնեց նաև, որ իր հիմնադրած կուսակցությունում ընդգրկված են նաև «Քաղաքացիական պայմանագրից»։ Նա նրանց անունները չնշեց՝ պարզաբանելով, որ իրենք ավելի ուշ հայտարարություն կանեն այս մասին։ Նրա խոսքով, նրանց մեջ հայտնի գործիչներ չկան, սակայն կուսակցությունը շատ համակիրներ ունի։
«Ժողովրդի մեջ այդ թեզը կա, որ ինչ-որ պահի մենք Փաշինյանի վարչապետ չլինելու մեր հայտարարված պայքարից կշեղվենք և կնպաստենք ՔՊ-ի՝ իշխանությանը մնալու գործընթացին։ Ուզենք, թե չուզենք, այդ խոսակցությունը լինելու է, բայց այդ տեսակետը կամաց-կամաց պետք է մաշեցնենք, զրոյացնենք մենք մեր քայեորվ, կեցվածքով, խոսքով»,- ընդգծեց Ագազարյանը։
Մանրամասները՝ տեսանյութում։
