Հարյուրավոր մարդիկ ցույց են անցկացրել Սիրիայի հարավում՝ դրուզ փոքրամասնության համար ինքնորոշում պահանջելով, հայտնում է AP-ն: Բողոքի ցույցը տեղի է ունեցել Սիրիայի հարավային Աս-Սուվեյդա քաղաքում:
Ցուցարարներից մի քանիսն ի նշան երախտագիտության Իսրայելի դրոշներ են ծածանել՝ հուլիսին դրուզ աշխարհազորայինների, բեդվինների և կառավարական ուժերի միջև բախումների ժամանակ դրուզների կողմից միջամտելու համար:
Ինչպես գրում է գործակալությունը՝ հղում անելով Մարդու իրավունքների սիրիական դիտորդական կենտրոնին, ցուցարարները դժգոհություն են հայտնել Սիրիայում ժամանակավոր կենտրոնական կառավարության նկատմամբ և պահանջել են պատասխանատվության ենթարկել դրուզների դեմ վայրագությունների պատասխանատուներին:
Ցուցարարներից մի քանիսը նաև կոչ են արել Իսրայելին միջամտել՝ աջակցելու իրենց ինքնորոշման պահանջին: Ռայան Մաարուֆը, որը ղեկավարում է «Սուվեյդա 24» ակտիվիստական մեդիա համայնքը, գործակալությանը հայտնել է, որ սա առաջին անգամն է, որ բողոքի ցույցերն անցկացվում են ինքնորոշման կարգախոսով: Նրա խոսքով՝ Աս-Սուվեյդայից բացի, բողոքի ցույցեր են անցկացվել նաև այլ տարածքներում, այդ թվում՝ մոտակա Շահբա և Սալխադ քաղաքներում:
Հունիսի կեսերին բախումներ էին տեղի ունեցել դրուզների և սուննի բեդվինների միջև։ Ավելի ուշ դրանց մասնակցել էին նաև կառավարական ուժերը՝ աջակցելով բեդվիններին։ Մարտական գործողությունների սկսվելուց հետո Իսրայելը մի շարք հարվածներ էր հասցրել կառավարական ուժերին՝ պնդելով, որ նրանց տեղակայումը Աս-Սուվեյդա տարածքում խախտում է Իսրայելի կողմից Սիրիայի հարավային մասի «ապառազմականացման» քաղաքականությունը։
Ապրիլի վերջին իսրայելական զինվորականները հարվածներ էին հասցրել Սիրիայի կառավարական ուժերին, երբ Դամասկոսի տարածքում սկսվել էին դրուզների և սուննիների միջև բախումներ։ 2025 թվականի մարտին Իսրայելի կառավարությունը վերահաստատել էր սիրիացի դրուզներին պաշտպանելու իր խոստումը՝ Սիրիայի արևմուտքում ալավիների վրա մի շարք հարձակումներից հետո։
