Իրանի և ԱՄՆ-ի փորձագիտական մակարդակով բանակցությունները, որոնք նախատեսված են ապրիլի 23-ին, միջնորդների հետ կանցկացվեն Օմանում, հայտնել է ՏԱՍՍ-ը՝ հղում անելով Իրանի արտաքին գործերի փոխնախարար Քազեմ Ղարիբաբադիին։
«Չորեքշաբթի օրը Մասկատում միջնորդների հետ տեղի կունենան փորձագիտական և տեխնիկական հանդիպումներ՝ բանակցությունների մանրամասները քննարկելու համար: Կողմերը ներկայումս մշակում են բանակցությունների վարման ընդհանուր սկզբունքները»,- ասել է նա՝ Իրանի խորհրդարանի Ազգային անվտանգության հանձնաժողովի հետ հանդիպման ժամանակ:
Ապրիլի 12-ին երկու երկրների ներկայացուցիչներն Օմանում անուղղակի բանակցություններ են վարել Իրանի միջուկային ծրագրի շուրջ ստեղծված իրավիճակի վերաբերյալ։ Ըստ լրատվամիջոցների՝ Թեհրանը Վաշինգտոնին հայտնել էր, որ պատրաստ է սահմանափակել ուրանի հարստացումը, եթե իրեն տրվեն հուսալի երաշխիքներ, որ ԱՄՆ նախագահ Դոնալդ Թրամփը կրկին չի հրաժարվի գործարքից։
Ապրիլի 19-ին Հռոմում անցկացվել էր Թեհրանի միջուկային ծրագրի վերաբերյալ անուղղակի բանակցությունների երկրորդ փուլը։ 4 ժամ տևած բանակցությունների ընթացքում պատվիրակությունները ավելի մեծ փոխըմբռնման էին հասել մի շարք հարցերի շուրջ։ Իրանի ԱԳ նախարար Աբբաս Արաղչին հայտնել էր, որ Վաշինգտոնը դեռևս չի փորձել հատել Թեհրանի «կարմիր գծերը» և չի ձգտել բանակցային օրակարգում ներառել Իրանի միջուկային ծրագրից դուրս հարցեր։
