Եվրախորհրդարանի մի խումբ պատգամավորներ ողջունել են Հայաստանի և Ադրբեջանի միջև խաղաղության պայմանագրի նախագծի տեքստի շուրջ բանակցությունների ավարտը։
«Հայաստանի կառավարությունն արժանի է գովասանքի այս կարևոր իրադարձության համար, որը հետևել է վերջին երկու չհամաձայնեցված հոդվածների վերաբերյալ Ադրբեջանի առաջարկն ընդունելու, ինչպես նաև համաձայնագիրը շուտափույթ ստորագրելու պատրաստակամության մասին հայտարարությանը»,- նշել են պատգամավորները։
Նրանք վստահություն են հայտնել, որ Ադրբեջանի ղեկավարությունը «կօգտվի այս պատմական հնարավորությունից՝ վերջ դնելու տասնամյակների հակամարտությանը և կառուցելու բարգավաճ Հարավային Կովկաս՝ ստորագրելով և իրականացնելով բանակցված խաղաղության համաձայնագիրը»։
Հայտարարության հեղինակները նաև կոչ են արել հետագա առաջընթաց ապահովել սահմանների սահմանազատման և տարածաշրջանային հաղորդակցությունների բացման գործընթացում՝ ինքնիշխանության, իրավասության, փոխադարձության և հավասարության հիման վրա։
Հայտարարությունն ստորագրել են Եվրախորհրդարանի արտաքին հարաբերությունների հանձնաժողովի ղեկավար Դեյվիդ Մաքալիսթերը, Եվրանեսթ խորհրդարանական վեհաժողովի պատվիրակության նախագահ Սերգեյ Լագոդինսկին, Հարավային Կովկասի հետ հարաբերությունների գծով Եվրախորհրդարանի պատվիրակության ղեկավար Նիլ Ուշակովը, ինչպես նաև Հայաստանի և Ադրբեջանի գծով Եվրախորհրդարանի մշտական զեկուցողներ Միրիամ Լեքսմանը և Դեն Բարնան։
Մարտի 13-ին Ադրբեջանի ԱԳՆ-ն հայտարարել էր Երևանի և Բաքվի միջև խաղաղության պայմանագրի տեքստի շուրջ բանակցությունների ավարտի մասին՝ հայկական կողմի վերջին երկու կետերի վերաբերյալ Բաքվի առաջարկները ընդունելուց հետո։ Հայաստանի ԱԳՆ-ն հաստատել էր լուրը և հայտարարել, որ Երևանը պատրաստ է Բաքվի հետ քննարկել համաձայնագրի ստորագրման ժամկետները և վայրը։ Վարչապետ Նիկոլ Փաշինյանը մանրամասնել էր Երևանի և Բաքվի միջև խաղաղության պայմանագրի երկու կետերի բովանդակությունը և հաստատել, որ հարցերը վերաբերում էին հայ-ադրբեջանական սահմանին երրորդ երկրների ներկայացուցիչների բացակայության դրույթին, ինչպես նաև միջազգային դատարաններում հայցերը հետ կանչելու խնդրին։ Մարտի 13-ին Ադրբեջանի նախագահ Իլհամ Ալիևը հայտարարել էր, որ Բաքվի վստահության մակարդակը Հայաստանի նկատմամբ «մոտ է զրոյին»։
