ԶԼՄ-ն նշել է Իսրայելի վրա Իրանի հարձակման հնարավոր սցենարը

ԱՄՆ-ը կօգնի Իսրայելին հետ մղել Իրանի հարձակումը, որը, ամերիկյան զինվորականների կարծիքով, կիրականացվի մոտ օրերս, գրել է «Կոմերսանտ»-ը՝ հղում անելով CNN-ին։

Իրանը այդպես կպատասխանի ՀԱՄԱՍ-ի քաղաքական առաջնորդ Իսմայիլ Հանիայի սպանությանը, որը տեղի էր ունեցել հուլիսի 31-ի գիշերը Թեհրանի հյուրանոցներից մեկում։

Պարբերականը նշել է, որ սկզբում ենթադրվում էր, որ իսրայելական հրթիռը շրջանցել է իրանական հակաօդային պաշտպանությունը, սակայն The New York Times-ի նոր տվյալների համաձայն՝ Իսմայիլ Հանիան սպանվել է ռումբով, որը տեղափոխվել է հյուրանոց ՀԱՄԱՍ-ի քաղաքական առաջնորդի՝ այնտեղ տեղափոխվելուց երկու ամիս առաջ։

Իրանի համար սա աղետալի ձախողում է, նշել է պարբերականը։ Ըստ նրա՝ Թեհրանի հյուսիսում գտնվող տարածքը հսկվում է Իսլամական հեղափոխության պահապանների կորպուսի կողմից, և համալիրների ցանցն օգտագործվում է գաղտնի բանակցությունների և ճանաչված հյուրերի համար, ինչպիսին Հանիան էր:

Ըստ CNN-ի` Իրանի պատասխանը կարող է ներառել նաև Իրաքում և Սիրիայում ամերիկյան զորքերի վրա հարձակումները:

Տարածաշրջանում վստահված զինյալները ամիսներ շարունակ հարձակումներ են գործել ԱՄՆ-ի թիրախների վրա: Սակայն հունվարից հետո, երբ Հորդանանում անօդաչու թռչող սարքը սպանեց երեք ամերիկացի զինվորականների, հարձակումներն ավարտվել են: Իրանի հրամանով դրանք կարող են վերսկսվել։

Հուլիսի 31-ին Հանիան և իր թիկնապահներից մեկը զոհվել էին Թեհրանում իրենց նստավայրի գնդակոծության հետևանքով: Նա Թեհրան էր ժամանել Փեզեշքիանի երդմնակալության արարողությանը մասնակցելու համար: ՀԱՄԱՍ-ում հաստատել են, որ Հանիան սպանվել է իսրայելական հարվածի հետևանքով։ Հանիայի մահից հետո Իրանի Ղոմ քաղաքի Ջամքարան մզկիթի գմբեթի վրա վրեժխնդրության կարմիր դրոշ էին բարձրացրել։ Իրանի նախագահ Մասուդ Փեզեշքիանը Հանիայի մահից հետո հայտարարել էր, որ երկիրը կպաշտպանի իր ինքնիշխանությունը և ահաբեկիչներին կստիպի զղջալ արարքի համար։

Հուլիսի 31-ին ԶԼՄ-ները հայտնել էին, որ իսրայելական հարձակման հետևանքով սպանվել է «Հեզբոլլահի» հրամանատար Ֆուադ Շուքերը, որին մեղադրում էին հուլիսի 27-ին Իսրայելի կողմից վերահսկվող Գոլանի բարձունքներում գտնվող դրուզական Մաջդալ Շամս բնակավայրի հրթիռակոծման համար։ Տարածաշրջանում լարվածությունը սրվել էր բնակավայրի հրթիռակոծությունից հետո, որի հետևանքով զոհվել էր 12 երեխա և դեռահաս:

2023-ի հոկտեմբերի 7-ի առավոտյան պաղեստինյան իսլամիստական ​​ՀԱՄԱՍ շարժումը հայտարարել էր Իսրայելի դեմ «Ալ-Աքսա ջրհեղեղ» ռազմական գործողության մեկնարկի մասին։ Իսրայելական բանակն ի պատասխան հայտնել էր Գազայի հատվածում «Երկաթե սրեր» հակաահաբեկչական գործողության մեկնարկի մասին։ Իսրայելի նախագահ Բենիամին Նեթանյահուն հայտարարել էր, որ Իսրայելը կպատերազմի ՀԱՄԱՍ-ի դեմ մինչև վերջնական հաղթանակ։ Euronews-ը, հղում անելով Գազայի առողջապահության նախարարությանը, հուլիսի 31-ին հայտնել էր, որ 2023-ի հոկտեմբերի 7-ից ի վեր ավելի քան 40 000 պաղեստինցի է սպանվել և շուրջ 84 700-ը վիրավորվել են իսրայելական գործողության հետևանքով: