Ռուսական պատվիրակությունը ժամանել է Բելառուս՝ բանակցելու ուկրաինական կողմի հետ:
Ինչպես հայտնում է TACC-ը՝ այս մասին հայտնել է Ռուսաստանի նախագահի մամուլի քարտուղար Դմիտրի Պեսկովը:
«Ձեռք բերված պայմանավորվածության համաձայն՝ ՌԴ պատվիրակությունը ժամանել է Բելառուս՝ ուկրաինացիների հետ բանակցելու համար», -ասել է նա՝ հավելելով, որ պատվիրակության կազմում ՌԴ արտաքին գործերի նախարարության, պաշտպանության նախարարության և այլ գերատեսչությունների ներկայացուցիչներ են: Պատվիրակության կազմում նաև նախագահի վարչակազմի ներկայացուցիչներ կան:
«Պատրաստ կլինենք այդ բանակցությունները սկսել Գոմելում»,- հստակեցրել է Պեսկովը:
Ավելի վաղ ՌԴ նախագահ Վլադիմիր Պուտինը փետրվարի 21-ին հեռուստաուղերձում ասել էր, որ անհրաժեշտ է համարում անհապաղ ճանաչել ԼԺՀ-ի և ԴԺՀ-ի ինքնիշխանությունը, և ստորագրել է համապատասխան հրամանագրեր։ Փետրվարի 24-ի առավոտյան Պուտինը հայտարարեց Դոնբասում ռազմական գործողություն սկսելու մասին։ Դիմելով ուկրաինացի ժողովրդին՝ Ուկրաինայի նախագահ Վլադիմիր Զելենսկին ասել է, որ Ուկրաինայի վրա հարձակվել են հյուսիսից, հարավից, արևելքից, իսկ Դոնբասում զինվորականները ծանր մարտեր են մղում։ Նա ասել է, որ Ուկրաինայի իշխանությունները որոշել են խզել դիվանագիտական հարաբերությունները Ռուսաստանի հետ։
