ԱՄՆ նախագահ Դոնալդ Թրամփն իր օգնականներին հանձնարարել է պատրաստվել Իրանի երկարատև շրջափակմանը, հայտնել է The Wall Street Journal (WSJ)-ը՝ հղում անելով ԱՄՆ պաշտոնյաներին։
Հրապարակման համաձայն՝ վերջին շաբաթներին Սպիտակ տան առաջնորդը կողմ է արտահայտվել Իսլամական Հանրապետության տնտեսության վրա ճնշման մեծացմանը՝ կանխելով նավերի, այդ թվում՝ նավթատարների դուրս գալն իրանական նավահանգիստներից։ Թրամփը կարծում է, որ այլընտրանքային տարբերակները, այդ թվում՝ ռմբակոծությունների վերսկսումը կամ հակամարտությունից հրաժարվելը, ավելի մեծ ռիսկեր են ներկայացնում Վաշինգտոնի համար, քան շրջափակման շարունակությունը։
WSJ-ն նշում է, որ նախագահը հակասական խորհուրդներ է ստանում այն մասին, թե ինչպես շարունակել հակամարտությունը։ Որոշ պաշտոնյաներ կոչ են անում ուժեղացնել ճնշումը Թեհրանի վրա, մինչդեռ մյուսները մտահոգություն են հայտնում, որ Հորմուզի նեղուցը փակ պահելը կամ ռազմական գործողությունների շարունակությունը կարող են բացասաբար անդրադառնալ ԱՄՆ տնտեսության և ազդել հանրապետական միջանկյալ ընտրությունների արդյունքի վրա։
Ավելի վաղ ԱՄՆ կենտրոնական հրամանատարությունը (CENTCOM) հայտնել էր, որ ԱՄՆ շրջափակման պատճառով իրանական Չահ Բահար նավահանգստում մնացել է ավելի քան 20 նավ։ Ռազմական տվյալների համաձայն՝ գործողության սկսվելուց ի վեր ԱՄՆ ռազմածովային ուժերի նավերը և ուղղաթիռները խափանել են Իրանի հետ կապված 39 առևտրային նավ, որոնք ուղևորվում էին կամ դուրս էին գալիս իրանական նավահանգիստներ։
Ապրիլի 28-ին The New York Times-ը գրել էր, որ Թրամփը չի ընդունի Իրանի վերջին առաջարկը, որը նախատեսում է Հորմուզի նեղուցի բացում, բայց միջուկային ծրագրի հարցը թողնում է ապագա բանակցությունների համար: Լրատվամիջոցների հաղորդագրությունների համաձայն՝ Վաշինգտոնը շուտով կարող է իր պատասխանը ներկայացնել Թեհրանին:
