Քրդստանի ազգային կոնգրեսը (KNK) դատապարտել է 1915 թվականի Հայոց ցեղասպանությունը և կոչ արել Թուրքիային պաշտոնապես ճանաչել այս հանցագործությունը, հայտնում է քրդական Hawar լրատվական գործակալությունը։
Կոնգրեսի հայտարարության մեջ նշվում է, որ 1915 թվականին Օսմանյան կայսրությունը և նրա դաշնակիցները ցեղասպանություն են իրականացրել Միջագետքի և Անատոլիայի քրիստոնյա բնակչության նկատմամբ, որի ընթացքում զոհվել են նաև բազմաթիվ եզդի քրդեր։
Ընդգծվում է, որ Օսմանյան Թուրքիայի ղեկավարությունն ու պետական կառույցները մասնակցել են այս հանցագործություններին։
«Ցեղասպանության վերքերը շարունակում են արյունահոսել։ Այս ժողովուրդների կողմից կրած վնասները շարունակում են ցավոտ ողբերգություն մնալ նոր սերունդների համար՝ վերջին 110 տարիների ընթացքում»,- ասվում է հայտարարության մեջ։
Նշվում է, որ Օսմանյան կայսրության իրավահաջորդի՝ ժամանակակից Թուրքիայի հրաժարվելը ճանաչել ցեղասպանությունը նշանակում է, որ մեղսակից է այս հանցագործությանը և շարունակում է այն կատարել այլ ձևերով։
«Ցեղասպանության 111-րդ տարելիցի առթիվ կոչ ենք անում Թուրքիային ճանաչել ցեղասպանությունը և կատարել իր պարտավորությունները: Մենք վերահաստատում ենք 1915 թվականի ցեղասպանության մեր դատապարտումը և պահանջում, որ այն ճանաչվի բոլոր համապատասխան մարմինների և հաստատությունների կողմից»,- հայտարարել է KNK-ն:
Քրդստանի ազգային կոնգրեսը հիմնադրվել է Ամստերդամում՝ 1999 թվականի մայիսին, և քրդական քաղաքական կուսակցությունների և քաղաքացիական հասարակության կազմակերպությունների կոալիցիա է: Կուսակցության գլխավոր գրասենյակը գտնվում է Բրյուսելում:
Ավելի վաղ Թուրքիայում քրդամետ ընդդիմադիր Ժողովրդական (DEM) կուսակցությունը հայտարարել էր Հայոց ցեղասպանության ճանաչման կարևորության մասին:
