Մարդկային եղբայրության համաշխարհային օրվան նվիրված իր ուղերձում և «Զայեդ» մարդկային եղբայրության մրցանակի շնորհման առթիվ Հռոմի պապ Լևոն XIV-ը գովել է Հայաստանի վարչապետ Նիկոլ Փաշինյանին և Ադրբեջանի նախագահ Իլհամ Ալիևին՝ նրանց անվանելով «հույս ցանողներ այն աշխարհում, որը չափազանց հաճախ պատեր է կառուցում կամուրջների փոխարեն», հայտնում է Vatican News-ը։
«Անտարբերության հեշտ ճանապարհի փոխարեն համերաշխության դժվար ուղին ընտրելով՝ նրանք ցույց տվեցին, որ նույնիսկ ամենախորն արմատացած բաժանումները կարող են հաղթահարվել կոնկրետ գործողությունների միջոցով։ Նրանց աշխատանքը վկայում է այն համոզմունքի մասին, որ եղբայրության լույսը կարող է գերակշռել եղբայրասպանության խավարին»,- ասել է պապը դափնեկիրներին ուղղված իր ուղերձում։
Փետրվարի 4-ին Փաշինյանը և Ալիևն ստացել էին 2026 թվականի «Զայեդ» մարդկային եղբայրության մրցանակը։ Աբու Դաբիում կայացած մրցանակաբաշխության ժամանակ ելույթ ունենալով՝ Փաշինյանը նշել էր, որ խորհրդանշական է համարում, որ երկու երկրների առաջնորդները միասին են ստացել մրցանակը՝ նշելով, որ «հակամարտության էջը փակվել է»։ Ադրբեջանի նախագահն, իր հերթին, ընդգծել էր, որ Երևանի և Բաքվի փորձը ցույց է տալիս խաղաղության հասնելու հնարավորությունը նույնիսկ երկարատև հակամարտություններից հետո, եթե կողմերը պատրաստ լինեն հրաժարվել պատերազմի տրամաբանությունից և շարժվեն առաջ։
Այդ օրն ավելի վաղ Փաշինյանն ու Ալիևը քննարկել էին TRIPP նախագծի և այլ ենթակառուցվածքային նախագծերի իրականացումը։ Հայաստանի և Ադրբեջանի ղեկավարները համաձայնել էին շարունակել ուսումնասիրել երկկողմ առևտրատնտեսական համագործակցության ընդլայնման հնարավորությունները։
«Զայեդ» մարդկային եղբայրության մրցանակը հիմնադրվել է 2019 թվականին՝ ի պատիվ ԱՄԷ հիմնադիր շեյխ Զայեդ բին Սուլթան ալ Նահյանի, և շնորհվում է անհատներին և կազմակերպություններին՝ խաղաղ համակեցության և մարդկային եղբայրության խթանման գործում ունեցած իրենց ներդրման համար։ Հիմնադրումից ի վեր՝ մրցանակը ստացել է 15 երկրի 16 ներկայացուցիչ։
