102 տարեկան հասակում մահացել է ֆրանսահայ շանսոնյե Շառլ Ազնավուրի քույրը՝ Աիդա Ազնավուր-Կառվարենցը, հայտնում է «Ազնավուր» հիմնադրամը:
Հիմնադրամի հայտարարության մեջ ասվում է, որ նա խաղաղությամբ է հեռացել կյանքից՝ թողնելով սիրով, ուժով, շնորհով և նվիրվածությամբ լի կյանք իր ընտանիքին:
«Մեր սրտերը վշտացած են, բայց լի են երախտագիտությամբ Աիդայի հետ միասին անցկացրած տարիների համար։ Նրա սերն ու ջերմությունը միշտ կմնան մեզ հետ։ Աիդայի մահվան կապակցությամբ մենք հարգանքի տուրք ենք մատուցում ոչ միայն մեր սիրելի քրոջը և հորաքրոջը, այլև անչափ արժևորում ենք արժանապատվորեն ու նվիրվածությամբ ապրած նրա կյանքը»,- նշվում է հաղորդագրության մեջ:
Ազնավուրը ծնվել է 1923 թվականին՝ Սալոնիկում։ Նրանց եղբոր հետ կապում էին ոչ միայն հայկական արմատներն ու փարիզյան մանկությունը, այլև խորը կապը՝ հիմնված ընդհանուր պատմության, երաժշտության և փոխըմբռնման վրա։ Նրանց հարաբերությունները կառուցվել են բացառիկ փոխադարձ հարգանքի և ստեղծագործական հարաբերությունների վրա: Շանսոնյեն հաճախ քրոջն անվանում էր իր մշտական ուղեկիցն ու ընտանիքի մասին կենդանի հիշողությունը, նշում է հիմնադրամը։ Ազնավուր-Կառվարենցը կհուղարկավորվի Մոնֆոր-լ'Ամուրի ընտանեկան գերեզմանատանը՝ հարազատների և ամուսնու կողքին:
Աշխարհահռչակ շանսոնյեն մահացել էր 2018 թվականի հոկտեմբերի 1-ին՝ 94 տարեկան հասակում:
