Ազգային ժողովն ընդունել է «Ընտրական օրենսգրքում» և «Հանրաքվեի մասին» օրենքում փոփոխությունների նախագիծը, որոնց համաձայն՝ խորհչդարանական ընտրություններին և հանրաքվեներին կարող են մասնակցել միայն այն քաղաքացիները, որոնք քվեարկությանը նախորդող 730 օրվա ընթացքում Հայաստանում փաստացի գտնվել են առնվազն 366 օր։
Խորհրդարանը համապատասխան օրինագիծը հաստատել է երկրորդ ընթերցմամբ և վերջնական՝ 63 «կողմ», 0 «դեմ» և 0 ձեռնպահ ձայներով։
Նախաձեռնությունը ներկայացնելիս «Քաղաքացիական պայմանագիր» խմբակցության պատգամավոր Ալխաս Ղազարյանը նշել է, որ միայն քաղաքացիությունը բավարար չէ համապետական նշանակության որոշումների կայացմանը մասնակցելու համար։ Նրա խոսքով՝ ընտրելու իրավունքը պետք է հիմնված լինի ոչ միայն քաղաքացիության և տարիքի, այլ նաև քաղաքացու՝ Հայաստանի հետ «փաստացի, ստուգելի և կայուն կապի» առկայության վրա։
Նախագծով նախատեսվում են բացառություններ այն քաղաքացիների համար, որոնք արտերկրում են գտնվում պետական ծառայության, դիվանագիտական կամ հյուպատոսական ծառայության շրջանակում, նրանց ընտանիքի անդամների համար, ինչպես նաև արտերկրի բարձրագույն ուսումնական հաստատություններում ուսանողների դեպքում։
Ընտրողների ցուցակների ձևավորման ընթացքում նախատեսվում է օգտագործել ընտրողների ռեգիստրի և սահմանային էլեկտրոնային կառավարման համակարգի տվյալները, ինչը պետք է ապահովի քաղաքացիների՝ երկրում փաստացի գտնվելու ստուգումը։
Պատգամավորների հարցերին պատասխանելով՝ Ղազարյանը նշել է, որ նախաձեռնության նպատակն է հնարավորություն տալ երկրի ապագան որոշելու այն քաղաքացիներին, որոնց կենսական շահերը անմիջապես կապված են Հայաստանի հետ։
Նրա խոսքով՝ նախագծի նախնական տարբերակը նախատեսել էր մեկ տարվա ընթացքում վեցամսյա բնակության պահանջ, սակայն քննարկումների արդյունքում այն մեղմացվել է՝ դառնալով վերջին երկու տարվա ընթացքում մեկ տարվա պահանջ։ Նա նաև չի բացառել բացառությունների ցանկի ընդլայնման հնարավորությունը։
«Հայաստան» խմբակցության պատգամավոր Գեղամ Մանուկյանը հայտարարել է, որ նախաձեռնությունը փաստացի բաժանում է քաղաքացիներին՝ նրանց, ովքեր պահպանում են և ովքեր կորցնում են ընտրություններին մասնակցելու իրավունքը։ Նա ընդգծել է, որ փոփոխությունները կանդրադառնան նաև արտերկրում աշխատող քաղաքացիներին, որոնք պահպանել են կենսական և ընտանեկան կապերը Հայաստանի հետ, ինչպես նաև կասկածի տակ է դրել նախաձեռնության սահմանադրականությունը։
Որպես օրինակ Մանուկյանը նշել է ազգային հավաքականների ֆուտբոլիստներին և շախմատիստներին, որոնք երկար ժամանակ գտնվում են երկրի սահմաններից դուրս։
Պատգամավոր Արծվիկ Մինասյանը հայտարարել է, որ սահմանափակումները հակասում են Սահմանադրությանը, քանի որ Հիմնական օրենքը նման լրացուցիչ պայմաններ չի նախատեսում Ազգային ժողովի ընտրություններին մասնակցելու համար։ Ընդդիմությունը հայտարարել է, որ մտադիր է վիճարկել օրենքը Սահմանադրական դատարանում։
