«Մեր ձևով» շարժումը հերքել է ՀՀ վարչապետի աշխատակազմի ղեկավարի տեղակալ Տարոն Չախոյանի՝ «Հայաստանի էլեկտրական ցանցեր» (ՀԷՑ) ընկերությունում 400 միլիոն դրամի աշխատավարձերի մասին հայտարարությունը՝ այն անվանելով «սուտ և ապատեղեկատվություն»:
Չախոյանը մեկնաբանել է «Տաշիր» ընկերությունների խմբի նախագահ Սամվել Կարապետյանի կուսակցության թեկնածուի պատրաստակամությունը՝ վարչապետի պաշտոնում հրաժարվել պարգևավճարներից և ստանալ ընդամենը 1 դրամ աշխատավարձ՝ հայտարարելով, որ «Մեր ձևով»-ի ներկայացուցիչները չեն հետաքրքրվել թոշակառուներով այն շրջանում, երբ ստանում էին «400 միլիոն դրամի չափով աշխատավարձ»։
Շարժման մամուլի խոսնակ Մարիաննա Ղահրամանյանը հիշեցրել է, որ «Մեր ձևով» շարժման համակարգող, ՀԷՑ-ի տնօրենների խորհրդի նախագահ Նարեկ Կարապետյանն իր ամբողջ աշխատավարձը կամավոր փոխանցել է «Տաշիր» բարեգործական հիմնադրամին՝ թոշակառուներին և սոցիալապես խոցելի այլ խմբերին օգնելու, նրանց կարիքները թեթևացնելու համար:
«Ի դեպ՝ նույնը խորհուրդ ենք տալիս անել նաև ձեզ»,- նշել է Ղահրամանյանը և տեղադրել 2025 թվականի սեպտեմբեր ամսվա հրապարակումը՝ աշխատավարձերի ամբողջական ծավալով բարեգործական նպատակներով փոխանցումը հաստատող անդորրագրերով:
Նա նաև ընդգծել է, որ ՀԷՑ-ի տնօրենների խորհրդի աշխատավարձը վճարում է «Տաշիր» ընկերությունների խմբի ղեկավարը սեփական միջոցներից:
«Այդ միջոցներն, առհասարակ, մաս չեն կազմում սակագնի, և ինչպես Դուք եք ասում, «տատիկ-պապիկների վճարած գումարները չեն»։ Եվ, այո՛, իշխանությունը ժողովրդին ծառայելու մասին է, բարձր աշխատավարձերի ու բազմամիլիոնանոց պարգևավճարների մասին չէ»,- եզրափակել է նա։
Ավելի ուշ «Մեր ձևով» շարժման համակարգողը տեղեկացրել է, որ այս ամսվա ընթացքում 20 000 թոշակառու իր թոշակը կստանա Սամվել Կարապետյանի ստեղծած ընկերությունների վճարած հարկերից։
«Երեկ, այսօր և վաղը՝ երեք օրում, ՀՀ պետբյուջե կփոխանցենք շուրջ 1 000 000 000 դրամ հարկ։ Այս ամսվա ընթացքում 20 000 թոշակառու իրենց թոշակը կստանան Սամվել Կարապետյանի ստեղծած ընկերությունների վճարած հարկերից։ Հուսով եմ՝ այս գումարները չեն ուղղվի պարգևավճարների»,- գրել է նա։
Կարապետյանը հունվարի 15-ին հայտարարել էր, որ առաջիկա ընտրություններում «Տաշիր» ընկերությունների խմբի ղեկավարի նախաձեռնած քաղաքական ուժի հաղթանակի դեպքում Հայաստանի վարչապետը կստանա տարեկան 1 դրամ աշխատավարձ և պարգևավճարների իրավունք չի ունենա: Վարչապետ Նիկոլ Փաշինյանը նույն օրը հայտնել էր, որ իր վարձատրության ամսական աճը կազմել է շուրջ 1,5 մլն դրամ: Նրա խոսքով՝ վճարումների բարձրացումն իր անձնական որոշումը չէր և իրականացվել է պետական, կառավարական որոշման շրջանակներում: ԱԺ նախագահ Ալեն Սիմոնյանը հունվարի 19-ին պաշտպանել էր պետական պաշտոնյաներին պարգևավճարներ հատկացնելու քաղաքականությունը՝ հայտարարելով, որ այդ գումարները փաստացի նրանց աշխատավարձի բաղկացուցիչ մասն են, այլ ոչ թե լրացուցիչ խրախուսանք:
