ArCa վճարային քարտերով կատարված անկանխիկ գնումների համար քաղաքացիները կստանան 2% հետվճար, հայտարարել է HH ֆինանսների նախարարի տեղակալ Էդգար Մկրտչյանը։
Ըստ նրա՝ ծրագիրը վերաբերում է ArCa քարտերով ապրանքներ և ծառայություններ գնող ֆիզիկական անձանց։ Հետվճարը կհաշվարկվի ամսվա ընթացքում կատարված գնումների համար և կվերադարձվի հաջորդ ամսվա 25-ին։ Մկրտչյանը պարզաբանել է, որ ծրագիրը չի տարածվի Visa և MasterCard քարտերով գործարքների վրա:
Պայմանների համաձայն՝ ծրագրում կգործեն մի շարք սահմանափակումներ։ Մեկ գործարքի համար նվազագույն գումարը պետք է լինի առնվազն 1000 դրամ, իսկ առավելագույն վերադարձը՝ 6000 դրամ։ Ամսական առավելագույն հետվճար սահմանվում է 60 000 դրամ, որը համարժեք է մինչև 3 000 000 դրամի անկանխիկ գնումների։
Փոխնախարարի պարզաբանմամբ՝ ծրագրից բացառվել են մի շարք վճարումներ, օրինակ՝ կոմունալ, կապի և տեղեկատվական ծառայությունների, պետական և համայնքային բյուջեներին վճարումները: Խաղատների և խաղային ծառայությունների, ծանոթությունների կայքերի, թվային ֆայլերի պահպանման ծառայությունների, կրիպտո դրամապանակների, բարձր ռիսկի ֆինանսական հարթակների, ավտոմատ կերպով երկարաձգվող բաժանորդագրությունների, թանկարժեք մետաղների և քարերի հետ գործարքների, ինչպես նաև ֆինանսական հաստատությունների ծառայությունների վճարումների համար նույնպես հետվճար չի կատարվի:
Փոխնախարարի խոսքով՝ հետվճարի 1%-ը ծածկվում է պետական բյուջեի, իսկ ևս 1%-ը՝ Armenian Card ՓԲԸ-ի կողմից: Նա չի բացառել ապագայում համատեղ քարտերի թողարկման հնարավորությունը, որոնք կարող են որակավորվել հետվճարի մեխանիզմի համար: Ըստ նրա՝ Հայաստանում ներկայումս շրջանառության մեջ է մոտ 500 000 ArCa քարտ, սակայն այս թիվը հավասար չէ քարտատերերի թվին․ մեկ անձը կարող է ունենալ մի քանի քարտ:
Մկրտչյանը նաև վստահեցրել է, որ ArCa-ի գործընկերները պատրաստ են սպասվող տեխնիկական բեռին, չնայած հնարավոր խափանումները լիովին բացառել հնարավոր է։
Ծրագիրը փորձնական նախագիծ է, և դրա իրականացման ընթացքում նախատեսվում է կանոնավոր մոնիթորինգ՝ հնարավոր խնդիրները և բարելավման ոլորտները ժամանակին բացահայտելու համար, պարզաբանել է Մկրտչյանը։ Նա նշել է, որ ապրանքներն ու ծառայությունները փաստորեն քաղաքացիների համար միջինում 2%-ով կէժանանան։
