Պետդումայի պատգամավոր Կոնստանտին Զատուլինը Բաքվում հայ գերիների դեմ ընթացող գործընթացը որակել է որպես «ցուցադրական» դատավարություն և «անձնական վրեժխնդրության ակտ» Ադրբեջանի նախագահ Իլհամ Ալիևի կողմից:
Նշելով, որ 2023 թվականին Լեռնային Ղարաբաղի ամբողջ հայ բնակչությունը փախել է Հայաստան «Ադրբեջանում դրախտային կյանքի հեռանկարներից», պատգամավորն ընդգծել է, որ «սա 21-րդ դարի խայտառակություն է, որը կրկնում է, թեկուզ փոքր և ոչ այնքան արյունալի մասշտաբներով, 20-րդ դարի սկզբին հայերի նկատմամբ հաշվեհարդարի սարսափները»:
Զատուլինի խոսքով՝ «Լեռնային Ղարաբաղի հայերի դավաճանության գլխավոր մեղավորը վարչապետ Նիկոլ Փաշինյանն է»:
«Խոր ափսոսանքով եմ հայտնում, որ Լեռնային Ղարաբաղի և նրա առաջնորդների ողբերգության հետ կապված պատմության ստվերն ընկնում է նաև մեզ վրա՝ Ռուսաստանում, որ խաբվել է իր խաղաղապահ գործողությունից, ինչից էլ այսօր օգտվում է պարոն Փաշինյանը։ Ամոթ է»,- եզրափակել է Զատուլինը։
Դեկտեմբերին Բաքուն դատարան էր հանձնել Ադրբեջանում ապօրինի պահվող 15 անձանց, այդ թվում ՝ Արցախի նախկին առաջնորդների քրեական գործը։ Նրանք մեղադրվում են 2548 դրվագով։
Այս գործով անցնում են Արցախի նախկին նախագահներ Արկադի Ղուկասյանը, Արայիկ Հարությունյանը և Բակո Սահակյանը, Արցախի ԱԺ նախագահ Դավիթ Իշխանյանը, ԱԳ նախկին նախարար Դավիթ Բաբայանը, պաշտպանության նախկին նախարար Լևոն Մնացականյանը, Արցախի պաշտպանության բանակի հրամանատարի նախկին առաջին տեղակալ Դավիթ Մանուկյանը, ինչպես նաև Գարիկ Մարտիրոսյանը, Մելիքսեթ Փաշայանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը և Էրիկ Ղազարյանը: Նախկին պետնախարար Ռուբեն Վարդանյանին Բաքվի բանտում ցմահ ազատազրկում է սպառնում:
Հունվարի 17-ին Բաքվում սկսվել էին Լեռնային Ղարաբաղի ութ քաղաքական և ռազմական առաջնորդների դատավարությունները: Վարդանյանին ցմահ ազատազրկում է սպառնում Բաքվի բանտում։ Նախկին պետնախարարը հունվարի 16-ի հայտարարության մեջ իր քրեական գործով բոլոր արձանագրությունները կեղծված էր անվանել և մի քանի պահանջ ներկայացրել ադրբեջանական իշխանություններին:
Վարդանյանին և Բաքվում պահվող մյուս բոլոր հայերին աջակցելու կոչ էին արել «Ավրորա» մարդասիրական նախաձեռնության համահիմնադիր Նուբար Աֆեյանը, «Տաշիր» ընկերության խմբի նախագահ Սամվել Կարապետյանը, Հայաստանի ֆուտբոլի հավաքականի նախկին ավագ Հենրիխ Մխիթարյանը և այլ գործիչներ:
Հունվարի 19-ին միջազգային իրավական հարցերով ներկայացուցչի գրասենյակը հայտնել էր, որ Հայաստանը Մարդու իրավունքների եվրոպական դատարան և ՄԱԿ-ի Միջազգային դատարան կներկայացնի Ադրբեջանում պահվող հայերի վերաբերյալ լրացուցիչ ապացույցներ և պահանջներ:
Վարդանյանի գործով նիստը տեղի կունենա հունվարի 27-ին: Դատարանը բավարարել էր նախկին պետնախարարի փաստաբանների միջնորդությունը՝ գործին ծանոթանալու համար լրացուցիչ ժամանակ անհրաժեշտ լինելու մասին՝ Վարդանյանին տրամադրելով 10 օր։
