Վրաստանում բողոքի ակցիաների հետևանքով երեկ՝ դեկտեմբերի 3-ին, հիվանդանոց է տեղափոխվել 15 մարդ, այդ թվում՝ հանրահավաքի 11 մասնակից, լրատվամիջոցների 3 աշխատակից և ՆԳՆ 1 ներկայացուցիչ, հայտնել է Վրաստանի առողջապահության նախարարությունը։
Գերատեսչության տվյալներով՝ տուժածներից մի քանիսը շարունակում են բուժում ստանալ, նրանց կյանքին վտանգ չի սպառնում։ Նախարարությունը զգուշացրել է, որ տվյալները ներառում են միայն Արտակարգ իրավիճակների համակարգման և շտապօգնության կենտրոնի կողմից հոսպիտալացվածների թիվը։
Վրաստանում բողոքի ցույցերը նոր թափ էին ստացել նոյեմբերի 29-ին՝ կապված նոյեմբերի 28-ին իշխանությունների որոշման հետ, ըստ որի՝ մինչև 2028 թվականը նրանք օրակարգից հանել են Եվրամիությանը երկրի անդամակցության շուրջ բանակցությունները։
Երկրի վարչապետ Իրակլի Կոբախիձեն հայտարարել էր, որ ցուցարարները բողոքում են գոյություն չունեցող խնդրի դեմ, քանի որ եվրաինտեգրման գործընթացը չի դադարել։ Նոյեմբերի 29-ին Վրաստանում ոստիկանությունն արցունքաբեր գազ էր կիրառել ցուցարարների նկատմամբ, ոստիկանների և ցուցարարների միջև բախումներ էին տեղի ունեցել։
Հոկտեմբերի 26-ին հանրապետությունում անցկացվել էին խորհրդարանական ընտրություններ, հաղթել էր «Վրացական երազանքը»։
Վրաստանի նախագահը, «Հանուն փոփոխությունների», «Միասնություն ազգային շարժում» և «Ուժեղ Վրաստան» կոալիցիան չէին ճանաչել ընտրությունների արդյունքները։ Բոլոր չորս կուսակցությունները հրաժարվել էին աշխատել նոր խորհրդարանում և նախագահի հետ բողոքի ցույցի էին դուրս եկել։
