Վրաստանի իշխող «Վրացական երազանք» կուսակցությունն ապրիլի 20-ին նոր հայց է ներկայացրել Սահմանադրական դատարան՝ ընդդիմադիր մի շարք կուսակցությունների գործունեությունն արգելելու պահանջով, ըստ Ekhokavkaza-ի՝ հայտարարել է խորհրդարանի խոսնակ Շալվա Պապուաշվիլին՝ նշելով, որ նախկինում ներկայացված հայցը հետ կկանչվի, իսկ նոր տարբերակում կընդլայնվի ընդգրկված կուսակցությունների ցանկը։
Սկզբում իշխանությունը պահանջում էր արգելել երեք ընդդիմադիր միավորում՝ «Միասնություն-Ազգային շարժում», «Փոփոխությունների կոալիցիա» և «Ուժեղ Վրաստան-Լելո», որոնք հաղթահարել էին 2024 թվականի խորհրդարանական ընտրությունների անցողիկ շեմը։ Նոր հայցում, ըստ Պապուաշվիլիի, կներառվի նաև «Ֆեդերալիստներ» կուսակցությունը, որի առաջնորդներն են Գիգա Բոկերիան և Թամար Չերգոլեիշվիլին։
Իշխանությունները պնդում են, որ նշված քաղաքական ուժերը ներգրավված են «հակասահմանադրական գործողությունների» մեջ՝ փորձելով լեգիտիմությունից զրկել ընտրությունները և չճանաչել պետական ինստիտուտները։ Պապուաշվիլին ընդգծել է, որ «Ֆեդերալիստների» ընդգրկումը պայմանավորված է ինչպես նրանց քաղաքական նպատակներով, այնպես էլ քաղաքական գործընթացների վրա ունեցած ազդեցությամբ։
Վրաստանի վարչապետ Իրակլի Կոբախիձեն դեռ մարտի սկզբին հայտարարել էր, որ իշխանությունները պատրաստվում են վերանայել Սահմանադրական դատարան ներկայացված հայցը։ Միաժամանակ, մարտի 2-ին մի շարք ընդդիմադիր ուժեր, այդ թվում՝ «Ֆեդերալիստները», ստեղծել էին դաշինք՝ հայտարարելով համատեղ գործողությունների, բողոքի միասնական ռազմավարության և քաղաքական բանտարկյալների ազատման ու ազատ ընտրությունների անցկացման նպատակների մասին։
