Վրաստանում Հայաստան-Վրաստան տնտեսական համագործակցության միջկառավարական հանձնաժողովի 15-րդ նիստում ՀՀ վարչապետ Նիկոլ Փաշինյանը և Վրաստանի վարչապետ Իրակլի Կոբախիձեն ստորագրել են նիստի արձանագրությունը՝ հայտարարելով հարաբերությունները խորացնելու պատրաստակամության մասին։
Եռակողմ հարաբերություններ, խաղաղությանն աջակցելու պատրաստակամություն, տարածաշրջանային գործընթացներ
Փաշինյանը շնորհակալություն է հայտնել Վրաստանին՝ Հայաստանի և Ադրբեջանի միջև խաղաղության գործընթացին ցուցաբերած աջակցման համար։ Փաշինյանն ընդգծել է՝ միջազգային ու տարածաշրջանային իրավիճակը շատ բարդ է: Միևնույն ժամանակ՝ կարևորել է մարտահրավերների, ռիսկերի տարածաշրջանային ընկալումն ու Վրաստանի հետ հարաբերությունների նշանակությունը։
«Վերջին տարիներին Վրաստանի աջակցությամբ փորձում ենք նաև խորացնել եռակողմ տարածաշրջանային համագործակցություն՝ Վրաստանի, Ադրբեջանի և Հայաստանի միջև: Կարծում եմ՝ սա էլ մի ուղղություն է, որը շատ մեծ հեռանկար ունի, և ես հույս ունեմ, որ առաջիկայում հնարավորություն կունենանք այս առումով նույնպես որոշակի զարգացումներ ունենալ»,- շեշտել է ՀՀ վարչապետը։
Վրաստանի վարչապետն, իր հերթին, նշել է տարածաշրջանում խաղաղությունը պահպանելու անհրաժեշտության մասին։ Այդ համատեքստում նա կարևորել է Հայաստանի և Ադրբեջանի միջև խաղաղության շուրջ բանակցությունները։ Նա հայտարարել է, որ Թբիլիսին պատրաստ է աջակցել տարածաշրջանում խաղաղաշինությանը և կայունությանը և այդ հարցում որևէ ջանք չի խնայի։
«Կարևոր է պատմական համաձայնությունը, համաձայնագիրը, որը դուք և Ադրբեջանն ստորագրեցիք։ Այս ամենն, իհարկե, շատ լավ հիմքեր է ընձեռում մեր տարածաշրջանի մասին ավելի լավ հոգ տանելու համար։ Մեզնից կախված ամեն ինչ կանենք, որպեսզի զարգացնենք տարածաշրջանը»,- ասել է Կոբախիձեն:
Փաշինյանը վրացի գործընկերներին տեղեկացրել է նաև տարածաշրջանային գործընթացների՝ Հայաստան-Թուրքիա, Հայաստան-Ռուսաստան հարաբերությունների, ինչպես նաև TRIPP («Թրամփի ուղի հանուն միջազգային խաղաղության և բարգավաճման») նախագծի իրականացման աշխատանքների մասին։
Կոբախիձեն Փաշինյանի հետ համատեղ հայտարարությանը նշել է, որ Վրաստանը մշտապես շահագրգռված է երկկողմ ռազմավարական գործընկերության խորացմամբ՝ հիմնված ընդհանուր շահերի վրա։
Տնտեսական համագործակցություն․ զբոսաշրջությունից առևտրաշրջանառություն
Փաշինյանն անգնահատելի է անվանել Թբիլիսիի աջակցությունը՝ Ադրբեջանից դեպի Հայաստան Վրաստանի տարածքով գնացքների երթուղին ապահովելու համար։
«Անկախությունից ի վեր Ադրբեջանի տարածքով Հայաստան գնացք չէր մտել, բայց հիմա Ադրբեջանով, Վրաստանով գնացքներ են գալիս Հայաստան։ Այսօր Հայաստանի և Ադրբեջանի միջև տնտեսական կապեր են հաստատվում Վրաստանի աջակցությամբ և օգնությամբ»,- կարևորել է Փաշինյանը։
Կոբախիձեն հայտարարել է, որ Հայաստանը Վրաստանի արտաքին առևտրաշրջանառության գործընկերների առաջին տասնյակում է, զբոսաշրջիկների թվով՝ առաջին եռյակում։
«Շատ արժեքավոր է այսպիսի համագործակցություն ունենալը։ Մենք շատ ուրախ ենք, որ Հայաստանից Վրաստան այցելուների հետաքրքրությունն ավելանում է: Պետք է է՛լ ավելի խորացնենք այս համագործակցությունը»,- շեշտել է Վրաստանի վարչապետը։
Փաշինյանը հավելել է, որ Հայաստանի զբոսաշրջիկների համար Վրաստանը կա և շարունակում է մնալ ամենասիրված ուղղություններից մեկը:
«Ուրախ ենք տեսնել, որ այցելությունները Հայաստանից Վրաստան աճում են: Միևնույն ժամանակ՝ ուրախ ենք տեսնել, որ Վրաստանից Հայաստան այցելություններն աճում են»,- նշել է Փաշինյանը։
