Մոսկվան դեմ կլինի արևմտյան երկրների պնդմամբ Երևանի և Բաքվի միջև «հապճեպ հասունացած» խաղաղության փաստաթղթերի կնքմանը, հայտարարել է ՌԴ ԱԳՆ ղեկավարի տեղակալ Միխայիլ Գալուզինը։ Ըստ նրա՝ սա «ական» կդնի ապագա սերունդների համար և երկարաժամկետ կարգավորման չի հանգեցնի։
«Նման հապճեպ, չմտածված և ամբողջությամբ չստուգված որոշումները չեն կարող հանգեցնել երկարաժամկետ կայուն խաղաղության, այլ, ընդհակառակը, ապագայում կարող են ցանել առճակատման որոշակի սերմեր, ինչն, իհարկե, մենք չափազանց անցանկալի ենք համարում Հայաստանի և Ադրբեջանի, Հարավային Կովկասի կամ Ռուսաստանի համար»,- ասել է Գալուզինն Известия-ին տված հարցազրույցում։
Դիվանագետը քննադատել է նաև արևմտյան երկրներին, որոնք փորձում են Հայաստանի և Ադրբեջանի իշխանություններին մղել հնարավորինս շուտ խաղաղության պայմանագիր կնքել իրենց հարթակում։ Գալուզինը Երևանին և Բաքվին կոչ է արել վերադառնալ աշխատանքի տրանսպորտային հաղորդակցությունների ապաշրջափակման և տնտեսական կապերի վերականգնման եռակողմ խմբի շրջանակներում, որոնք այժմ «ընդհատված և սառեցված են»։
ՌԴ ԱԳՆ ղեկավարի տեղակալը Եվրամիությանը մեղադրել է Հայաստանից քաղաքական հավատարմություն պահանջելու և հակառուսական պատժամիջոցներին հավատարիմ մնալու մեջ՝ առանց վիզայի ռեժիմի հետ կապված որևէ խոստում տալու կամ որևէ լուրջ որոշում ընդունելու։ Նա այսպես է մեկնաբանել Հայաստանի հետ հարաբերությունների հնարավոր վատթարացումը ԵՄ-ի հետ մերձեցման դեպքում։ Գալուզինը հիշեցրել է, որ Եվրասիական տնտեսական միությանն անդամակցելը Հայաստանին բերում է «շոշափելի և նշանակալի երկարաժամկետ օգուտներ»՝ ԵԱՏՄ-ի հետ առևտրի ավելացման և միությունից Հայաստան ներդրումների տեսքով։
«Հայաստանի և ԵԱՏՄ-ի միջև ապրանքաշրջանառության ծավալը կազմում է մոտ 13 մլրդ դոլար, իսկ անցած տարի այն աճել է 53%-ով, մինչդեռ Եվրամիության հետ ապրանքաշրջանառության ծավալը նախորդ տարի հազիվ գերազանցել է 2 մլրդ դոլարը և նվազել 24%-ով»,- մանրամասնել է նա։
Գալուզինը վստահ է, որ կտրուկ պարադիգմային փոփոխությունը և անցումը դեպի Եվրամիություն կհանգեցնեն ՀՆԱ-ի անկման և հարված կհասցնեն հայկական բիզնեսին, տնտեսությանը և հասարակ քաղաքացիների կենսամակարդակին։
Հունվարի 8-ին ՀՀ ԱԳ նախարար Արարատ Միրզոյանը հայտարարել էր չստորագրված խաղաղության պայմանագրի պայմաններում Ադրբեջանի հետ սահմանին էսկալացիայի վտանգի մասին: Միաժամանակ, ՀՀ պաշտպանության նախարար Սուրեն Պապիկյանը գտնում է, որ տարածաշրջանում ռազմական էսկալացիայի հիմքեր այժմ չկան, իսկ Հայաստանի արտաքին հետախուզության ծառայությունը ցածր էր գնահատել Ադրբեջանի լայնածավալ ռազմական հարձակման հավանականությունը:
Կառավարությունը հունվարի 9-ի նիստում հավանություն էր տվել ՀՀ-ի՝ ԵՄ-ին անդամակցելու գործընթացի մեկնարկի վերաբերյալ նախագծին։ ՀՀ վարչապետ Նիկոլ Փաշինյանն ընդգծել էր, որ նախագիծը չի նշանակում Հայաստանի անհապաղ անդամակցում ԵՄ-ին, և վերջին խոսքը պետք է հայտնեն քաղաքացիները՝ հանրաքվեի միջոցով։ Նույն օրը Կրեմլից նշել էին, որ Հայաստանը չի կարող միաժամանակ լինել և՛ ԵՄ, և՛ ԵԱՏՄ անդամ։
Հունվարի 24-ին ՀՀ ԱԺ եվրոպական ինտեգրման հարցերի մշտական հանձնաժողովը դրական եզրակացություն էր տվել ԵՄ-ին անդամակցելու գործընթացի մեկնարկի վերաբերյալ նախագծին։ Հունվարի 29-ին ՌԴ փոխվարչապետ Ալեքսեյ Օվերչուկը հայտարարել էր, որ Հայաստանի անդամակցությունը Եվրամիությանը կհանգեցնի Եվրասիական տնտեսական միությունից (ԵԱՏՄ) Հայաստանի դուրս գալուն և ՀՀ-ի համար ԵԱՏՄ շուկայի փակմանը։
Հունվարի 31-ին ՌԴ ԱԳՆ պաշտոնական ներկայացուցիչ Մարիա Զախարովան հայտարարել էր, որ ԵՄ-ին Հայաստանի ինտեգրման հետևանքով հնարավոր է հայկական արտադրանքը բախվի ավելի բարձր մաքսատուրքերի, ինչը կբերի ՀՆԱ-ի աճի տեմպերի կտրուկ անկման և Հայաստանի բնակչության տոտալ աղքատացման։ Զախարովան կանխատեսել էր նաև հայկական ապրանքների արտահանման 80 տոկոս կրճատում։
