ՀՀ վարչապետի՝ ԱՄՆ մեկնելու գլխավոր առիթը ոչ թե 5-րդ ամենամյա Միջազգային կրոնական ազատության գագաթնաժողովին մասնակցելն էր, այլ Բաքվի վրա ճնշումը դադարեցնելու մասին ԱՄՆ-ին խնդրելը, Ֆեյսբուքի իր էջում գրել է ամերիկագետ Սուրեն Սարգսյանը։
Ըստ նրա՝ Փաշինյանը պետք է ԱՄՆ իշխանություններին, հայ համայնքին և լոբբիստներին համոզի, որ Վաշինգտոնը ճնշումներ չկիրառի Ադրբեջանի նկատմամբ, հրաժարվի 907-րդ բանաձևից և ցանկացած այլ բանաձևի հնարավոր ընդունումից, որը կարող է ուղղված լինել Ադրբեջանի և նրա նախագահ Իլհամ Ալիևի դեմ։
Ըստ փորձագետի՝ ՀՀ վարչապետի համար կարևոր է նաև հասկանալ, թե որքանո՞վ է վարչակազմը հետաքրքրված հայ-ամերիկյան ռազմավարական գործընկերությամբ և ԱՄՆ առաջնահերթություններով։
Սարգսյանի կարծիքով՝ Փաշինյանի համար կենսական անհրաժեշտություն է հասկանալ, թե ո՞ր ուղղությամբ է զարգանալու ԱՄՆ նախագահ Դոնալդ Թրամփի արտաքին քաղաքականությունը։
«Արդյոք նա կարո՞ղ է ապավինել ԱՄՆ աջակցությանը, և արդյոք Թրամփի վարչակազմը կտրամադրի՞ այն տնտեսական, ֆինանսական և քաղաքական աջակցությունը, որը Բայդենի վարչակազմը տրամադրում էր Փաշինյանին»,- նշել է Սարգսյանը։
Ըստ փորձագետի՝ ՀՀ վարչապետի համար նաև կենսական նշանակություն ունի ԱՄՆ նոր վարչակազմի դիրքորոշումը հայ-ադրբեջանական բանակցությունների փաթեթի վերաբերյալ։
«Փաշինյանը պետք է հասկանա, թե արդյոք Թրամփի թիմը պատրա՞ստ է շարունակել միջնորդ լինել Հայաստանի և Ադրբեջանի միջև խաղաղության պայմանագրի շուրջ բանակցություններում»,- շեշտել է Սարգսյանը։
Նրա կարծիքով՝ վարչապետը Վաշինգտոն այցի ժամանակ կփորձի հասկանալ, թե ԱՄՆ վարչակազմը հետաքրքրվա՞ծ է իր՝ «Խաղաղության խաչմերուկի» կոնցեպտով և որքանո՞վ է պատրաստ աջակցել դրա կյանքի կոչմանը:
«Նա պետք է պարզի, թե արդյոք ամերիկացիները շարունակելո՞ւ են միջնորդավորված աշխատել Թուրքիայի հետ՝ հայ-թուրքական հարաբերությունների կարգավորմանը նպաստելու համար»,- գրել է Սարգսյանը։
Փորձագետը համոզմունք է հայտնել, որ Փաշինյանը ցանկանում է պարզել Թրամփի քաղաքականությունն Իրանի և Ռուսաստանի նկատմամբ, որպեսզի հասկանա, թե «որքա՞ն մանևրելու հնարավորություն կունենա այս երկրների հետ հարաբերություններում կամ որքա՞ն կկարողանա դիստանցավորվել դրանցից»։
Սարգսյանի խոսքով՝ ԱՄՆ-ն Հայաստանի վարչապետին բարձր մակարդակի հանդիպում կտա՝ ելնելով արարողակարգից և բարեվարքությունից։ Նա կանխատեսել է ԱՄՆ փոխնախագահ Վենսի հետ վաղը կամ պետքարտուղար Ռուբիոյի հետ հաջորդ օրը հանդիպելու մասին։
Հունվարի 15-ին ԱՄՆ Պետդեպարտամենտը մեկնաբանել էր Հայաստանի հետ ստորագրված ռազմավարական գործընկերության կանոնադրությունը։ ՀՀ ԱԳՆ-ն, իր հերթին, մանրամասն տվյալներ էր ներկայացրել, թե ի՞նչ է պարունակում Հայաստանի և Միացյալ Նահանգների միջև ռազմավարական գործընկերության փաստաթուղթը։
