ԿԳՄՍ նախարարությունը շրջանառության մեջ է դրել օրենքի մի նախագիծ, որով առաջարկվում է հաստատել «Իրական Հայաստանի գեղագիտության տեղորոշման և աջակցության» հայեցակարգը, նախագիծը քննարկման է դրվել e-draft հարթակում։
Նախագծին այս պահի դրությամբ կողմ է քվեարկել 226, դեմ՝ 158 մարդ։ Հիմնավորման մեջ նշվում է՝ որոշման նախագծի ընդունման անհրաժեշտությունը պայմանավորված է «այն հանգամանքով, որ Հայաստանի հետագա զարգացումն ու պետականության ամրապնդումը պետք է հիմնվի նաև ՀՀ բովանդակության արտահայտման և դրսևորման գեղագիտական ձևերի վրա, որոնց հստակ ձևակերպումը և այդ ձևերի խրախուսման քաղաքականությունը բացակայում է»։
Ըստ նախագծի հեղինակների՝ «Իրական Հայաստանի գեղագիտության» հիմնական մոտեցումը ձևակերպվել է այսպես՝ «հայացք դեպի ներս, որ օգնում է արդյունավետ հարաբերվել դրսի հետ»։
«Իրական Հայաստանի մշակութային, սոցիալական, հոգևոր և հոգեբանական բովանդակության չբացահայտվածությունը և իբրև այդպիսին ներկայացվող միջավայրերի անհամադրելիությունը ՀՀ գաղափարի հետ, առաջ են բերում խնդիրներ նաև քաղաքական և իրավական հարթության մեջ Իրական Հայաստանը սահմանելու և այդ սահմանումը մինչև վերջ իրացնելու տեսանկյունից։ Ուստի անհրաժեշտ է Իրական Հայաստանի գեղագիտությունը ձևակերպելն ու այն փոխկապակցելը քաղաքական և իրավական իրողություններին, որոնք նաև Իրական Հայաստանի հանրային ամբողջական ընկալման հիմք կդառնան՝ հանդես գալով իբրև հանրային համերաշխության առանցքային գործոն»,- ասվում է օրենքի նախագծում։
Կառավարության որոշմամբ՝ Արարատի պատկերը նոյեմբերից չի լինելու ՀՀ մուտքի, ելքի սահմանահատման կնիքի վրա: Աշխատանքի և սոցիալական հարցերի նախարար Արսեն Թորոսյանը հայտարարել էր, որ սահմանային կնիքները համապատասխանեցվել են «Իրական Հայաստանի» գաղափարախոսությանը:
