ՀՀ ԶՈւ գլխավոր շտաբի պետի նախկին տեղակալ, ՀՀ ազգային հերոս, գեներալ-լեյտենանտ Տիրան Խաչատրյանի գործով նախաքննությունն ավարտվել է, մեղադրական եզրակացությունն ուղարկվել է դատարան, հայտնում է փաստաբան Վարազդատ Հարությունյանը։
«Այս փուլում միանշանակ հաստատվեց պաշտպանական թիմի այն պնդումը, որ Խաչատրյանն ապօրինի է կալանավորվել։ Խաչատրյանի կալանավորումը նախաքննական մարմնի և դատարանի կողմից հիմնավորվում էր ակտիվ քննչական գործողությունների կատարման անհրաժեշտությամբ, սակայն փաստացի առանց դրանց կատարման` ընդամենը 20 օր հետո գործն ուղարկվեց դատարան»,- գրել է փաստաբանը։
Հարությունյանը հավելել է, որ քրեական վարույթի քննությունն ընթացել է 4 տարի, Խաչատրյանը մեղադրվում է միջին ծանրության հանցագործության մեջ, 4 տարուց ավել տևող քննությանը որևէ կերպ չի խոչընդոտել, և քանի որ մոտ է սույն գործի վաղեմության ժամկետների անցնելը և այն, որ այս մեղադրանքով Խաչատրյանին ազատազրկում չի սպառնում, դատավոր Մասիս Մելքոնյանի որոշմամբ՝ Խաչատրյանն արդեն 24 օր գտնվում է ապօրինի կալանքի տակ։
«Այժմ, երբ նախաքննությունն ավարտված է և գործի բոլոր նյութերը պաշտպանական կողմի տրամադրության տակ են, կարող ենք վստահ պնդել, որ ոչ միայն չի հիմնավորվել Խաչատրյանին առաջադրված մեղադրանքը, այլ հակառակը՝ հենց վարույթի նյութերում առկա ապացույցներով էլ հերքվում է այն։ Պաշտպանական կողմը պնդելու է, որպեսզի սպասվող դատական վարույթը իրականացվի դռնբաց ռեժիմով՝ ապահովելով դատավարության հրապարակայնությունը, որպեսզի հանրությունը նույնպես տեղեկացվի իրականության մասին»,- տեղեկացրել է փաստաբանը։
Հարությունյանը հավելել է, որ բարձրագույն ռազմական կրթությամբ զինվորական, Արցախյան բոլոր պատերազմների մասնակից Խաչատրյանը հունվարի 4-ից ապօրինաբար զրկվել է ազատությունից, նրա նկատամբ կալանքը կիրառվել է որպես իր քաղաքական և քաղաքացիական ակտիվ դիրքորոշումը ճնշելու և նրան պատժելու գործիք։
Հունվարի 4-ին պաշտպանները հայտնել էին Խաչատրյանին ձերբակալելու մասին։ Նրանք տեղեկացրել էին, որ Խաչատրյանը չի ընդունում իրեն առաջադրված մեղադրանքը։ Հունվարի 5-ին փաստաբանները տեղեկացրել էին, որ Խաչատրյանը 2 ամսով կալանավորվել է։ Նույն օրը Քննչական կոմիտեն հայտնել էր, որ Խաչատրյանի անփույթ վերաբերմունքը 44-օրյա պատերազմի ընթացքում ծանր հետևանքներ էր առաջացրել, այդ թվում՝ հակառակորդը առանց խոչընդոտի տիրացել էր ռազմավարական բարձունքի:
Խաչատրյանին կալանավորել էին 2024-ի հունվարի 15-ին՝ Կոտայքի մարզի ռեստորաններից մեկում տեղի ունեցած միջադեպին մասնակցելու կասկածանքով։ Դեպքի առթիվ քրվարույթ էր հարուցվել Քրեական օրենսգրքի խուլիգանության, ապօրինի կերպով հրազեն կրելու և զենքի գործադրմամբ առողջությանը միջին ծանրության վնաս պատճառելու հատկանիշներով։ Մարտի 4-ին դատարանը Խաչատրյանի կալանքը փոխարինել էր երկրից չհեռանալու մասին արգելքով։ Նրա նկատմամբ կիրառվել էր 5 մլն դրամ գրավ։
Խաչատրյանը պաշտոնանկ էր արվել 2020 թվականի հունիսի 15-ին։ 2021 թվականի մարտի 24-ին պաշտոնը վերականգնելու պահանջով նա հայց էր ներկայացրել այն ժամանակ ՀՀ պաշտպանության նախարարի պաշտոնն զբաղեցնող Վաղարշակ Հարությունյանի դեմ։ Վարչական դատարանը, սակայն, մերժել էր հայցը։
