Դատավոր Սարգիս Պետրոսյանը հերքել է այն պնդումները, թե «Տաշիր» ընկերությունների խմբի նախագահ Սամվել Կարապետյանի կալանքը տնային կալանքով փոխարինելու որոշումը որևէ պայմանավորվածության արդյունք է։ Լրագրողների հետ զրույցում նա անդրադարձել է այն գնահատականներին, որոնցում դատական ակտը որակվում էր որպես «պայմանավորված»։
«Դատավոր Պետրոսյանի հետ որևէ մեկը չի կարող պայմանավորվածություն ձեռք բերել։ Դատավոր Պետրոսյանը գործում է բացառապես օրենքով և իր խղճով»,- ասել է նա։
Պետրոսյանի խոսքով՝ իր բոլոր դատական ակտերը որոշակի առումով համարձակություն են պահանջում, քանի որ դատավորի պարտականությունն է գործել Սահմանադրության և օրենքների շրջանակում։
Անդրադառնալով հարցին՝ արդյոք պետությունը միջամտո՞ւմ է եկեղեցու գործերին, դատավորը հրաժարվել է մեկնաբանությունից՝ նշելով, որ որպես դատավոր՝ իրավունք չունի նման գնահատականներ տալ։ Նա նաև ընդգծել է, որ նույնիսկ որպես քաղաքացի ունի կաշկանդվածություն՝ որոշ հարցերի պատասխանելու առումով։
Լրագրողների հարցին, թե վերջին որոշումից հետո իր նկատմամբ ճնշումներ գրանցվե՞լ են, դատավորը պատասխանել է. «Իմ նկատմամբ որևէ անգամ ճնշում չի եղել, չկան և լիահույս եմ՝ երբևիցե չի լինի ճնշում, դատավորի կողմից անկախ, անաչառ դատական ակտ կայացնելու համար որևէ ճնշումներ չկան և չպետք է լինեն»։
Կարապետյանը կալանավորվել էր հունիսի 18-ին, երբ հրապարակավ քննադատել էր Հայաստանի իշխանությունների կողմից Ամենայն Հայոց կաթողիկոս Գարեգին Երկրորդի և հոգևորականների հասցեին հնչող հայտարարությունները։ Ավելի քան վեց ամիս անազատության մեջ անցկացնելուց հետո «Տաշիր» ընկերությունների խմբի նախագահը դեկտեմբերի 30-ին վերադարձել էր տուն։ Դատարանը բավարարել էր փաստաբանական թիմի միջնորդությունը՝ գործարարի խափանման միջոց կալանքը փոխարինելով տնային կալանքով ու գրավով։
