Ադրբեջանն իր օրակարգին կարողանում է հասնել, իսկ մենք անտեղյակ ենք և տեղեկանում ենք հանձնաժողովի և այլ նորությունների մասին ադրբեջանական կամ թուրքական իշխանություններից: Այս մասին այսօր ArmeniaТoday-ի հետ զրույցում ասաց Մարդկային զարգացման միջազգային կենտրոնի (ՄԶՄԿ) տնօրեն Թևան Պողոսյանը՝ անդրադառնալով Ադրբեջանի ԱԳ նախարար Ջեյհուն Բայրամովի հայտարարությանը, ըստ որի՝ Հայաստանը և Ադրբեջանը համաձայնեցրել են սահմանազատման և սահմանագծման հանձնաժողովի կազմը, սակայն առաջին նիստը դեռ տեղի չի ունեցել։
«Ադրբեջանը ժամանակին ինքն է հրապարակել իր կողմից առաջարկված հինգ կետերը, ինչը նշանակում է, որ համանախագահները, միջազգային հանրությունը, Ադրբեջանի հասարակաությունը գիտեն, Հայաստանի հասարակությունը գիտի, թե որոնք են այդ կետերը: Մերոնք ասում են՝ ինչ-որ առաջարկներ են ներկայացրել, բայց մեզ չեն տեղեկացնում, թե ինչ: Բոլորը, փաստորեն, գիտեն՝ բացի Հայաստանի Հանրապետության հասարակությունից, և նշանակում է, որ ինչ-որ տեղից պետք է հոտ քաշենք՝ իմանանք, թե ինչ է»,- ասաց նա:
Դիտարկմանը, թե հատուկ հանձնարարություններով դեսպան, «Լուսավոր Հայաստան» կուսակցության նախագահ Էդմոն Մարուքյանը հայտարարել է, որ վեց կետանոց առաջարկում կա Արցախի կարգավիճակի հարցը, Թևան Պողոսյանն ասաց, որ նման հայտարարությունների փոխարեն պարզապես պետք է հրապարակել վեց առաջարկները, և բոլորը կարդալ գիտեն, կկարդան:
«Ումի՞ց եք գաղտնի պահում. թշամիդ գիտի, Թուրքիան գիտի, միջազգային հանրությունը գիտի, բոլորը գիտեն՝ բացի Հայաստանի Հանրապետության հասարակությունից»,- ասաց նա:
Անդրադառնալով անկլավների հարցին՝ Թևան Պողոսյանն ասաց, որ օր առաջ տեղեկություն եղավ, որ դեռ անկլավների հարց չկա, սակայն ադրբեջանական իշխանությունների կողմից այլ բան է հնչում: Ինչ վերաբերում է մեր անկլավներին, ապա նա ասաց, որ Էդմոն Մարուքյանը ասել է, որ չկա իրավական փաստաթուղթ, և եթե իրավական հարթությունում այդպիսի խնդիր չկա, ինչպե՞ս կարող է լուծվել այդ հարցը:
«Սահմանազատում և սահմանագծում անում են այն երկրների միջև, որոնք ունեն դիվանագիտական հարաբերություններ: Այսօրվա իշխանությունների վարած քաղաքականությունն այս ընթացքում շատ անվստահություն ներշնչող է և ավելի շատ նման է թշնամու օրակարգը սպասարկելուն: Թուրքիայի, Ադրբեջանի օրակարգն ավելի շատ են սպասարկում, քան մեր ազգային շահերը: Պարտված իշխանությունից միայն պարտություն կարելի է սպասել:
Մենք պետք է կարողանանք այսօրվա դրությամբ մեր ազգային օրակարգը բարձրացնենք և ուրախ եմ որ հայության մի մասը կարողանում է պայքար տանել»,- ասաց նա:
