«Հայաստանի էլեկտրական ցանցեր» ընկերության ժամանակավոր կառավարիչ Ռոմանոս Պետրոսյանը հավանական է համարել, որ ընկերությունը կզրկվի լիցենզիայից, այդ մասին նա հայտնել է լրագրողներին։
Պետրոսյանը նշել է, որ այդ սցենարը հավանական է համարում՝ հաշվի առնելով իր ուսումնասիրությունները։
«Ես, որպես ժամանակավոր կառավարիչ, իմ կառավարման 3,5 ամսվա ընթացքում ուսումնասիրությունների արդյունքում վեր եմ հանել շուրջ 10 հիմնավոր պատճառ, որոնց հիման վրա օրենքով սահմանված կարգով հավանական եմ համարում, որ ՀԷՑ-ը կզրկվի լիցենզիայից»,- նշել է նա։
Միևնույն ժամանակ՝ տեղեկացրել է, որ Հանրային ծառայությունները կարգավորող հանձնաժողովն առաջիկա 1 շաբաթվում կամ 10 օրում ՀԷՑ-ի հարցով նիստ է գումարելու՝ հաշվի առնելով, որ նոյեմբերի 18-ին ՀԷՑ-ի մասով վարույթն ավարտվում է։ Նա հավելել է, որ մինչ այդ, օրենքով սահմանված կարգով, հանձնաժողովը պետք է իր վերջնական եզրակացության նախագիծ հրապարակի, որին ծանոթանալու հնարավորություն կունենա նաև մյուս կողմը։
«Դրանից հետո արդեն ՀԷՑ-ի հետագա ճակատագիրը կկանխորոշվի արդեն ՀԾԿՀ ընդունած որոշումից բխող մյուս իրավակարգավորումներով»,- ընդգծել է նա։
Պետրոսյանը նշել է այն պատճառները, որոնք, ըստ նրա, ՀԷՑ-ին լիցենզիայից զրկելու հիմք են։ Առաջինը, նրա խոսքով, «հաշվետվությունների արժանահավատության խնդիրն է»։
«Հաշվետվությունները տարիներ ի վեր խեղված էին, ՀԷՑ-ի կառավարիչներն ու ղեկավարները տևական ժամանակ ՀԾԿՀ-ին կեղծ հաշվետվություններ են ներկայացրել, ինչն ուղղակիորեն ազդել է սակագնի ձևավորման վրա»,- շեշտել է Պետրոսյանը։
Երկրորդը, նրա խոսքով, ՀԷՑ-ն իր բնականոն գործունեությունն իրականացնելու համար իր կողմից իրականացվող գնումների, մատակարարումների, ձեռքբերումների գործընթացներն «իրականացրել է խիստ կողմնակալ ու խտրական»։
«ՀԾԿՀ նորմերին հակասող ձևաչափերով փակ, մենաշնորհային արժեշղթա է ստեղծվել, գերշահույթների միգրացիա է կատարվել ՀԷՑ-ից դեպի «Տաշիր» ընկերությունների խմբի՝ ուղիղ կամ անուղղակիոերն փոխկապակցված այլ տնտեսվարող սուբյեկտներ։ Տարիներ ի վեր տասնյակ միլիարդավոր ներդրումային ծրագրերը իրականացվել են «Տաշիրին» աֆիլացված տնտեսական միավորների կողմից՝ փակ պահելով էներգետիկ համակարգում որևէ երրորդ խաղացողի ներգրավումը և դրանով խոչընդոտելով ոլորտի զարգացմանը»,- հավելել է նա։
Պետրոսյանը նշել է նաև, որ մյուս խնդիրը կառավարությունից, ՀԾԿՀ-ից, հանրությունից «ՀԷՑ-ի իրական տեխնիկական, էներգետիկ կարողությունների ծայրահեղ վատթար վիճակը թաքցնելն է»։
«Դրանով արհեստականորեն իջեցրել են ցանցում կորուստների ցուցանիշները և փաստաթղթավորել են ՀԾԿՀ կողմից ներկայացված պլանների կատարումը։ Բացի այդ, ունենալով ահռելի ծավալների՝ իմ գնահատականով, տասնյակ միլիոնավոր կիլովատ ժամ քանակի էլեկտրաէներգիայի ստվերային շրջանառություն, շատ ցանցերում մոնետիզացրել են տնտեսության տարբեր ճյուղերում՝ դրանով ունենալով ահռելի ստվերային շրջանառություն»,- ընդգծել է նա։
Պետրոսյանը շեշտել է, որ իր նշած բոլոր փաստերով այս պահին շուրջ 1,5 տասնյակ քրեական վարույթ է նախաձեռնված և նախաքննություն է իրականացվում։
Ժամանակավոր կառավարիչը նաև չի հերքել, որ ընկերությունում աշխատակիցների է հեռացնում։ Նա չի ընդունել ընկերության սեփականատեր հանդիսացող «Տաշիր» ընկերությունների խմբի և ՀԷՑ-ի նախկին բարձրաստիճան ղեկավարների պնդումները, ըստ որոնց՝ աշխատակիցներին հեռացրել են քաղաքական պատճառներով։ Պետրոսյանը հերքել է տեղեկությունը, թե իր կառավարման օրվանից սկսած արգելել են մասնակցել ի պաշտպանություն ՀԷՑ-ի սեփականատեր Սամվել Կարապետյանի հանրահավաքներին։
«Մի քանի 100 ազատում է կատարվել՝ հիմնված իրավունքի և օրեքի գերակայության առաջանահերությունների վրա, հաշվի է առնվել ընկերության լավագույն շահը։ Այդ աշխատակիցները կա՛մ չեն համապատասխանել իրենց պաշտոններին, կա՛մ վնաս են հասցրել ընկերության օրինական շահերին, և եթե շարունակեին աշխատել՝ վնաս էին հասցնելու։ Մի քանի տասնյակ հայց կա, դատարանները, որպես ժողովրդավար երկրի դատարաններ, արդար որոշում կկայացնեն»,- համոզմունք է հայտնել Պետրոսյանը։
Իշխանությունները ՀԷՑ-ը վերահսկողության տակ վերցնելու գործընթաց էին նախաձեռնել, երբ ընկերության սեփականատերը եկեղեցուն աջակցելուց հետո կալանավորվել էր։ Ստոկհոլմի առևտրային պալատի արբիտրաժային ինստիտուտը հուլիսի 22-ին որոշում էր ընդունել, որը ՀՀ կառավարությանը պարտավորեցնում է ձեռնպահ մնալ ՀԷՑ-ի բռնագրավմանն ուղղված հետագա այլ քայլերից։ Օգոստոսի 4-ին արբիտրաժը հաստատել էր ՀԷՑ-ի բռնագրավումն արգելող որոշման պարտադիր լինելը։
Հոկտեմբերի 28-ին «Տաշիր» խմբի փոխնախագահ, ՀԷՑ ՓԲԸ-ի տնօրենների խորհրդի նախագահ Նարեկ Կարապետյանը հայտարարել էր, որ ՀԾԿՀ-ն մերժել է սակագինն իջեցնելու առաջարկը՝ հաշվի չառնելով խնայողությունների արդյունքում առաջացած 3,6 մլրդ դրամ դրական հաշվեկշիռը։ Ավելի ուշ «Տաշիր Կապիտալը» սակագինն իջեցնելու առաջարկով երկրորդ անգամ էր դիմել հանձնաժողով:
Կարդացեք նաև՝
Ստեր են հրապարակում․ Ղազինյանը՝ ՀԾԿՀ-ի կողմից հոսանքի սակագինը նվազեցնելու առաջարկը մերժելու մասին
«Տաշիր Կապիտալ»-ն էլեկտրաէներգիայի սակագների իջեցման առաջարկ է ներկայացրել ՀԾԿՀ
ՀԷՑ-ից շուրջ 50 աշխատողի են հեռացրել, նաև ճնշումներով դիմում գրողներ կան․ Դավիթ Ղազինյան
ՀԷՑ-ի անվտանգությունից մարդիկ էին եկել դատարանի մոտ՝ գույքագրելու ներկաներին․ Ղազինյան
ՀԾԿՀ-ի որոշումից հետո կձևակերպենք մեր մոտեցումը․ Փաշինյանը՝ ՀԷՑ-ը գնելու մասին
