«Բարգավաճ Հայաստան» կուսակցության առաջնորդ, գործարար Գագիկ Ծառուկյանին պատկանող «Մուլտի սթոուն» գործարանի աշխատակիցները, ձեռնարկության կապարակնքումից 11 օր անց, շարունակում են բողոքի ակցիաները գործարանի տարածքում՝ պահանջելով ապակնքել այն և հնարավորություն տալ աշխատելու։ Ուղիղ եթերը հեռարձակել է Armenia Today-ի You Tube-յան ալիքով։
Ակցիայի մասնակիցների հայտարարությամբ՝ բանկային վարկերի, կոմունալ վճարումների և բնակվարձերի վճարման վերջնաժամկետներն են, սակայն իրենք անգործ են մնացել, իսկ իրավապահներն ու պատկան մարմինները որևէ հստակեցում չեն տալիս արտադրամասերի վերաբացման կամ աշխատավարձերի վճարման մասին։
«Արդեն 10 օրից ավել է գնում-գալիս ենք, չգիտենք ինչքան կգնանք-կգանք։ Էլ չենք կարող ապրել, այսքան ժողովուրդ արդեն չգիտի ինչ անի, հիփոթեքով տուն են վերցրել, մեկը նորածին երեխա ունի, մեկը՝ չգիտեմ, հազար ու մի հարց ունի, վարկ ունի, պարտք ունի, վարձով է մնում։ Եթե վարձակալին ասես, չգիտեմ, փաստացի գործ կճարեմ, մի ամսից, երկու ամսից նոր կարողանամ վարձատրեմ, կասի՝ հա՞, հարց չկա՞․ բոլորը այդ նույն պահին կհանեն մարդկանց տնից»,- նշել են նրանք։
Աշխատակիցների խոսքով՝ իրենք խուսափում են հակաօրինական քայլերից, բայց իրավապահների անտարբերությունը ստիպում է դրանց դիմել: Ըստ նրանց՝ աշխատակիցներից մեկի առողջական վիճակն առավոտյան վատացել է հուզմունքի պատճառով, և նրան սրտի ստենտավորում են արել։
«Ո՛չ ուզում ենք անօրինություններ անենք, ո՛չ էլ ինչ-որ չգիտեմ․․․ բունտեր ենք անում կամ չգիտեմ․․․ ճանապարհներ ենք փակում։ Փորձում ենք այս ամեն ինչին գոնե լուծում տանք, չգիտեմ՝ ոնց կլինի»,- պարզաբանել է աշխատակիցներից մեկը։
Ավելի ուշ, ակցիայի մասնակիցները ոստիկանության ուղեկցությամբ գնացել են ՔԿ Կոտայքի մարզային քննչական վարչության Աբովյանի քննչական բաժին՝ պահանջելով գործարանի դուռը կապարակնքած աշխատակից Վազգեն Բադալյանի պարզաբանումը։ Ոստիկանությունից հայտնել են, որ անհնար է բարձրանալ նրա աշխատասենյակ՝ մինչև համապատասխան թույլտվություն չլինի։
Գործարանի աշխատակիցները հայտարարել են, որ կսպասեն մինչև ընդմիջման ավարտը՝ կասկած հայտնելով, թե Բադալյանը տեղում չէ։
«Բոլորս ունենք հացի խնդիր։ Կառավարությունը մի րոպեում 5 միլիարդի պարգևավճար կարա տա․․․իսկ մենք, որ առանց անօրինականության այստեղ ենք, հնարավոր չէ մեր հարցը լուծել։ Մարդիկ սպառնում են ճանապարհ փակել։ Ամեն մեկը արդեն մի բան ասում է»,- նշել է մեկ այլ աշխատող։
Ի պատասխան՝ ոստիկանության աշխատկիցները հիշեցրել են, որ օրեր առաջ հորդորել էին նրանց տուն գնալ։ «Ես ձեզ 10 օր առաջ ասացի՝ գնացեք տուն՝ սպասեք, չլսեցիք ինձ»,- պատասխանել են ոստիկանությունից։
Աշխատակիցները հակադարձել են, որ չեն հավատում, թե իրավապահները պատասխան կտան, իսկ իրենց գործարանից անօրինական են հեռացրել։ Հարցը «ուրիշ ձև լուծելու» մասին խոսքերին ոստիկանության աշխատակիցը պատասխանել է, թե այդ դեպքում նրանք «կպատժվեն»։
Ավելի ուշ գործարանի պահակապետը կապ է հաստատել քննիչ Բադալյանի հետ՝ զգուշացնելով, որ բարձրախոսով է խոսում։ Բադալյանն անջատել է հեռախոսը՝ խոսքը կիսատ թողնելով:
«Նպատակահարմար չեմ գտնում բարձրախոսով»,- ասել է Բադալյանը։
Նա տեղեկացրել է, որ աշխատավայրում չէ ու չի գալու։ Քննչականի աշխատակիցը չի պարզաբանել, թե որտեղ է գտնվում աշխատանքային ժամին։
Ակցիայի մասնակիցները վերադարձել են գործարան՝ նշելով, որ հասարակ մարդն այս պետության մեջ արժեք չունի, ու իրենց հիշում են միայն այն ժամանակ, երբ դա պետք է պետությանը։ Նրանց առաջարկը, թե Բադալյանի փոխարեն թող մեկ ուրիշ քննիչ մոտենա, մնացել է անարձագանք։
Նրանք տեղեկացրել են, որ կմնան գործարանի մոտ ինչքան պետք է, քանի որ Քննչականի մոտ իրենց հարցին ընթացք տվող չկա։
