ՀԷՑ նախկին տնօրեն, «Մեր ձևով» շարժամ անդամ Դավիթ Ղազինյանն Armenia Today-ին մեկնաբանել է ՀԷՑ-ի պետականացման վերաբերյալ վարչապետ Նիկոլ Փաշինյանի հայտարարությունները, որոնք վերջինս արել է այսօր՝ սեպտեմբերի 20-ին՝ «Քաղաքացիական պայմանագիր» կուսակցության համաժողովի ընթացքում։
Մասնավորապես, Փաշինյանը հայտարարել էր, որ ՀԷՑ-ի («Հայաստանի էլեկտրական ցանցերի») պետականացման հարցն «անկասելի է» և ՀԷՑ-ի հետ կապված՝ իշխանությունները քննարկում են երկու սցենար՝ ՀԷՑ-ի ամբողջական ազգայնացում կամ մասնակի փոխանցում միջազգային կառավարչին: Վարչապետը նաև նշել էր, որ ընկերությունում ստուգումների ընթացքում արդեն բացահայտված «խարդախությունները» բավարար են՝ արձանագրելու իշխանությունների մտահոգությունները նախկին կառավարման վերաբերյալ։
Փաշինյանի խոսքով՝ եթե հասկանան, որ ՀԷՑ-ի ծախսերն անհամաչափ բարձր են պետական բյուջեի համար, կքննարկեն փոխանցումը միջազգային կառավարչի։
«Նախ, առաջինը, փառք Աստծո, հասկացան, որ բյուջեի վրա բավական մեծ ծախս է լինելու, այսինքն՝ այդ մասը գոնե հասկացել են՝ հաշվի առնելով, որ ունենք Սահմանադրություն, ունենք օրենքներ, և ամեն այսպես հինգ հայտարարությունից չորսի մեջ խախտվում է այդ ամբողջը»,- նշել է Ղազինյանը։
ՀԷՑ-ի պետական կառավարման երկու ամիսը վկայում է՝ պետական կառավարում գոյություն չունի
Ղազինյանն ընդգծել է, որ ՀԷՑ-ի պետական կառավարման այս երկու ամիսը ցույց է տալիս, որ պետական կառավարում ուղղակի գոյություն չունի։ Նա վստահություն է հատնել, որ հաշվի առնելով իշխանությունների կադրային քաղաքականությունը՝ միջազգային ոչ մի ներդրող չի համաձայնելու այդ ակտիվը վերցնել այն պարզ պատճառով, որ այն խլել են։
«Միջազգային յուրաքանչյուր կազմակերպություն վերցնելուց առաջ չի կարող բացառել, որ իր հետ էլ նույնը չի կրկնվելու։ Այդ իսկ պատճառով շատ լուրջ խնդրի առաջ է կանգնելու»,- շեշտել է նա։
Նախկին տնօրենը հիշեցրել է, որ քանի դեռ ՀԿԾ հանձնաժողովի կողմից հարուցած վարույթը չի ավարտվել, կանխորոշել վարույթի ավարտը քրեորեն պատժելի արարք է, և իշխանություններին խորհուրդ է տվել խարդախությունների մասին խոսելիս այն որպես հանցագործություն դիտարկել դատարանի միջոցով օրինական ուժի մեջ մտած վճռից հետո:
«Այսինքն՝ հանձնաժողովի նախագահը, թեկուզ և անգրագետ, հակասահմանադրական, օրենսդրական փոփոխության հիման վրա միանձնյա վարույթ է հարուցել, այդ վարույթը 3+1 ամսվա ընթացքում պետք է ունենա ավարտ, և հանձնաժողովը, որպես կոլեգիալ մարմին, պետք է որոշի՝ ի՞նչ է անում։ Հիմա երկրի փաստացի ղեկավարն ասում է, որ արդեն աներկբա է, կանխորոշված է»,- նշել է Ղազինյանը։
ՀԷՑ-ի ժամանակավոր կառավարիչն ազատել է պրոֆեսիոնալերին
Հակադարձելով Փաշինյանի այն պնդմանը, որ ՀԷՑ-ի ժամանակավոր կառավարիչ «Ռոմանոս Պետրոսյանը չի կարող գիտակ աշխատողներին հեռացնել», Ղազինյանը հորդորել է նրան ժամանակավոր կառավարչին հանձնարարել, որպեսզի փաստերով խոսի և շեշտել՝ ազատվածների 90 և ավել տոկոսը ոլորտի մասնագետներ են, որոնք ներգրավված չեն որևէ կոռուպցիոն սխեմաների մեջ։
«Խոսքս վերաբերում է իրենց կողմից ազատված կադրերին, չբերեն մեր կողմից բացահայտված, ինչ-որ այսպիսի դեպքեր ներկայացնեն, իրենց կողմից ազատված պրոֆեսիոնալ կադրերի մասին է»,- մանրամասնել է նա։
Ղազինյան կրկնել է հրապարակային բանավեճի մասին իր առաջարկը՝ նշելով, որ իշխանություններն իրեն համարում են պատասխանատու ՀԷՑ-ը վատ վիճակի հասցնելու գործում։
«Հանրային հեռուստաընկերությունը իմ հետ ոչ մի հարցազրույց չի ցանկացել։ Մի պահ, երբ ՀԷՑ-ի թեման երևի ամենաակտուալն էր, բազմաթիվ հեռուստաընկերություններ ցանկություն ունեին ինձ հետ խոսել՝ որպես ժամանակավոր պաշտոնակատար, որպես գլխավոր տնօրեն, ո՛չ Հ1-ից, ո՛չ իրենց հետ փոխկապակցված որևիցե հեռուստաընկերությունից կամ լրատվամիջոցից այդպիսի հրավեր չեմ ստացել»,- նշել է նա
ՀԷՑ-ի դեմ Ղազինյանը երկու հայց է ներկայացրել
Խոսելով ՀԷՑ-ի դեմ ներկայացված երկու հայցի մասին՝ Ղազինյանը հայտնել է, որ աշխատանքի վերականգնման հայցով առաջին դատական նիստը սեպտեմբերի 23-ին է նշանակված։ Երկրորդը վերաբերում է կորպորատիվ վեճի, քանի որ տնօրենների խորհրդի կայացրած որոշումը կառավարիչը խախտել է։
«Այսինքն՝ տնօրենների խորհուրդն ունի որոշում, որ գլխավոր տնօրենի տեղակալին իրավունք չունեն ազատել առանց տնօրենների խորհրդի հետ համաձայնեցման։ Բայց կառավարիչը, բնականաբար, ունենալով «քարտ բլանշ» և մասսայական սխալ ազատումներ անելով՝ այդպիսի խնդիր չունի, նաև խախտել է դա»,- հավելել է նա։
Հուլիսի 18-ին Ռոմանոս Պետրոսյանը նշանակվել էր ՀԷՑ ընկերության ժամանակավոր կառավարիչ։ Նրա նախաձեռնությամբ չեղարկվել էր ավելի քան 3 մլրդ դրամ նախահաշվային արժեքով գնման 4 գործընթաց։
Հուլիսի 22-ին Ստոկհոլմի առևտրային պալատի արբիտրաժային ինստիտուտի կողմից նշանակված հրատապ արբիտրաժը պարտավորեցրել էր ՀՀ-ին ձեռնպահ մնալ ՀԷՑ-ի բռնագրավմանն ուղղված հետագա այլ քայլերից։
Սամվել Կարապետյանի պաշտպանության խորհուրդը հուլիսի 23-ին հայտնել էր, որ նա և նրա ընտանիքը հաղթել են Հայաստանի կառավարության դեմ նախաձեռնած արբիտրաժային հրատապ գործը ՀԷՑ ընկերության պետականացման հարցով: Կառավարությունն արձագանքել էր այս լուրին՝ նշելով, որ Ստոկհոլմի առևտրային պալատի արբիտրաժային ինստիտուտի՝ հրատապ գործով քննված հարցերի շրջանակն այլ է, քան ժամանակավոր կառավարիչ նշանակելու որոշման նպատակները և վերջինիս կողմից իրականացվելիք գործողությունները:
