Հայազգի եղբայրներ Մելքում և Մուշեղ Պետրոսյանների կողմից 1920 թվականին հիմնադրած Petrossian ընկերությունն արժանացել է L'Alliance New York»-ի Art de Vivre (Կենսակերպի արվեստ) մրցանակին, հայտնել է կազմակերպության պաշտոնական կայքը։
Art de Vivre մրցանակը շնորհվում է գաստրոնոմիայի, նորաձևության և գեղեցկության ոլորտների այն առաջնորդներին, ովքեր ներդրում ունեն ֆրանսիական ապրելակերպի մշակույթի խթանման գործում:
Petrossian ընկերությունը հիմնադրվել է Փարիզում՝ 1920 թվականին: Պետրոսյան եղբայրներն առաջինն էին, ովքեր սև խավիարը բերել էին Ֆրանսիա՝ ժամանակի ընթացքում այն վերածելով համաշխարհային մասշտաբի բրենդի։
Ավելի քան մեկ դար անց ընկերության հատուկ մասնագետները՝ «խավիարագետները», շարունակում են սերնդեսերունդ փոխանցել և պահպանել խավիարի բացառապես ձեռքով մշակման ավանդական հմտությունները։
Այսօր էլ Petrossian-ը 100%-ով մնում է ընտանեկան սեփականություն և այն ղեկավարում են հիմնադիրների թոռները՝ Միքայել և Ալեքսանդր Պետրոսյանները։
Բրենդը մինչ օրս պահպանում է Փարիզում 1920 թվականին բացված իր առաջին խանութը, իսկ ընկերության բուտիկները, ռեստորաններն ու դուստր ձեռնարկությունները ներկայացված են Նյու Յորքում, Լոնդոնում, Բրյուսելում, Բանգկոկում, Հոնկոնգում և Սինգապուրում։
