Բեռնատարների վարորդները հոկտեմբերի 16-ին Ռուսաստանի միգրացիոն օրենսդրության փոփոխությունների դեմ 2-րդ ակցիան են իրականացրել ՀՀ կառավարության մոտ։ Ակցիան հեռարձակվել է Armenia Today-ի Youtube-ի ալիքում։
Նրանք գործադիրից պահանջել են բանակցություններ վարել ռուս գործընկերների հետ՝ ՌԴ-ում գտնվելու 180 օրը 90 օր դարձնելու հարցով։ Նրանք պահանջում են չեղարկել 90 օրվա պահանջը։
Հունվարի 1-ից ՌԴ-ում օտարերկրյա քաղաքացիների իրավական կարգավիճակի մասին 115 ֆեդերալ օրենքի փոփոխությամբ՝ ոչ վիզային ռեժիմի քաղաքացիները, որոնք ՌԴ մուտք չեն գործում աշխատելու նպատակով, նախկին՝ տարվա յուրաքանչյուր 180 օրվա մեջ 90 օր գտնվելու փոխարեն տարվա մեջ կարող են գտնվել 90 օր։ Օրենքը տարածվում է նաև ուղևորներ և բեռներ փոխադրողների վրա։
Ակցիայի մասնակից բեռնատարների վարորդները նշել են, որ իրենց խնդիրը չլուծելու դեպքում պատրաստ են ճանապարհներ փակել։ Նրանցից մի քանիսը հայտնել են, որ 90 օրից ավել ՌԴ-ում գտնվելու համար պատժամիջոցների տակ են ընկել։ Վարորդներից մեկը տեղեկացրել է, որ իրեն 93 օր ՌԴ-ում գտնվելու համար 5 տարով զրկել են ՌԴ մուտքից։
«Մարդիկ կան՝ մի տնից են ու երկուսն էլ 5 տարով ՌԴ մուտքի արգելքի տակ են։ Եթե մենք չաշխատենք, ամբողջ Հայաստանը ապրանքների ներմուծման խնդիր է ունենալու»,- հայտարարել են վարորդները։
Նրանք Ղազախստանի օրինակն են բերել՝ նշելով, որ այդ երկրի իշխանությունները բանակցել են ՌԴ-ի հետ և, արդյունքում, իրենց վարորդների դեպքում չի տարածվում տարվա մեջ 90 օր գտնվելու պահանջը։ Վարորդները նշել են, որ ժամանակի ընթացքում չեն կարողանալու բեռներ բերել, ինչը ՀՀ տնտեսության համար կոլապս է առաջացնելու։
«Սովամահ ենք լինելու, ո՛չ բեռ ենք կարողանալու բերել, ո՛չ էլ հաց առնել։ Բեռնատարների վարորդները կարող են գործ գտնել, աշխատել, բա մնացած ժողովո՞ւրդը»,- ընդգծել է վարորդներից մեկը՝ նկատի ունենալով, որ իրենք նաև պարեն են փոխադրում երկիր։
Վարորդներին է մոտեցել ՀՀ էկոնոմիկայի նախարար Գևորգ Պապոյանը՝ նրանց հավաստիացնելով, որ կառավարությունը մեկ շաբաթ է՝ զբաղվում է խնդրով։ Նա տեղեկացրել է՝ խնդրի հարցով կան քննարկումներ, բայց ավելիի մասին խոսելը, ըստ նրա, կխանգարի բանակցություններին։
Պապոյանը կիսել է վարորդների մտահոգությունը, որ 90 օրը բավարար չէ բեռնափոխադրման աշխատանքները կազմակերպելու համար, քանի որ, օրինակ, նրանք միայն 90 օր կարող են Վերին Լարսի անցակետի հերթում կանգնել։ Պապոյանը նաև նշել է, որ ռուսական կողմից դրական ազդակ կա։
«Խնդրին տեղյակ ենք ու ձեզնից շատ ենք այդ հարցով զբաղվում։ Հավատացեք, ամենաբարձր մակարդակով՝ ԵԱՏՄ-ում զբաղվում ենք այդ հարցով։ Շատ մեծ հույս ունեմ, որ խնդիրը լուծվելու է»,- վարորդներին ասել է նախարարը։
Վարորդները, սակայն, Պապոյանին հայտնել են, որ չեն պատրաստվում դադարեցնել ակցիաները։ Նախարարն ի պատասխան՝ նշել է, որ դեմ չէ այն ամենին, ինչն արգելված չէ օրենքով։
«Հաշվի առեք, որ ամեն րոպե մեկին դեպորտ են անում»,- նախարարին փոխանցել են վարորդները։
Վարորդներն առաջին ակցիան իրականացրել էին հոկտեմբերի 13-ին։ ՌԴ միգրացիոն ծառայության տվյալներով՝ ամեն տարի առնվազն 300 հազար Հայաստանի քաղաքացի մուտք է գործում Ռուսաստան՝ աշխատելու նպատակով։
2024 թվականի դեկտեմբերի 26-ին ՌԴ ԱԳՆ-ն հայտարարել էր Ռուսաստանում օտարերկրացիների գտնվելու կանոնների փոփոխության մասին։ ՌԴ նախագահ Վլադիմիր Պուտինի՝ դեկտեմբերի 30-ի հրամանագրով՝ ՌԴ-ում անօրինական գտնվող օտարերկրացիները պետք է կարգավորեն իրենց իրավական իրավիճակը կամ ինքնուրույն լքեն երկիրը մինչև 2025 թվականի ապրիլի 30-ը։
Կարդացեք նաև՝
Ռուսաստանում ուժի մեջ են մտել միգրացիոն նոր կանոններ. ի՞նչ պետք է իմանալ
