Հայաստանի վարչապետ Նիկոլ Փաշինյանի այցը Իրան բեկումնային կլինի երկու երկրների հարաբերությունների բարելավման գործում։ Այս մասին հայտարարել է Իրանի նախագահ Էբրահիմ Ռաիսին ՀՀ վարչապետ Նիկոլ Փաշինյանի հետ համատեղ ասուլիսում, գրում է Mehr-ը։
Երևանի և Թեհրանի փոխգործակցության վերաբերյալ
Փաշինյանն ընդգծել է, որ Հայաստանը պնդում է, որ Իրանի պաշտոնյաները տեղեկացված լինեն բոլոր այն հարցերի մասին, որոնք հայկական կողմը բարձրացնում է եռակողմ բանակցություններում։
«Մենք պնդում ենք, որ Իրանը բավարար տեղեկատվություն ունի հայ-ադրբեջանական, հայ-թուրքական հարաբերությունների զարգացման, Լեռնային Ղարաբաղի հիմնախնդրի վերաբերյալ»,- ասել է Փաշինյանը։ Նա նշել է, որ Իրանի Իսլամական Հանրապետության նախագահին տեղեկացրել է հոկտեմբերի 31-ին Սոչիում կայացած եռակողմ հանդիպման արդյունքների մասին և ընդգծել, որ համաձայն է տարածաշրջանում կայուն խաղաղության և անվտանգության հաստատման անհրաժեշտության վերաբերյալ Ռաիսիի կարծիքին։ Ռաիսին իր հերթին ընդգծել է, որ Իրանը մեծ նշանակություն է տալիս բարիդրացիության քաղաքականությանը։
«Կովկասյան տարածաշրջանը Իրանի պատմության, քաղաքակրթության և մշակույթի մի մասն է, և մենք զգայուն ենք այս տարածաշրջանում տեղի ունեցող իրադարձությունների նկատմամբ»,- ասել է Իրանի նախագահը։ Ռաիսին նշել է, որ ցանկացած արտաքին միջամտություն Կովկասյան տարածաշրջանում հղի է լուրջ խնդիրներով։ Իրանի առաջնորդն ընդգծել է, որ տարածաշրջանի խնդիրների լուծումը «պետք է լինի պաշտոնյաների ու այս տարածաշրջանում ներգրավվածների ձեռքում»։
Երևանի և Թեհրանի միջև բարեկամական հարաբերությունները, անշուշտ, կհանգեցնեն իրավիճակի բարելավմանը տարածաշրջանում և աշխարհում, հավելել է նա։
Փաշինյանն իր հերթին ասել է, որ Իրանը «տարբեր կրոնների հետևորդների թափանցիկ համագործակցության և խաղաղ գոյակցության խորհրդանիշն է»։ Այս համատեքստում նա շնորհակալություն է հայտնել Ռաիսիին երկրի հայ համայնքի նկատմամբ Իրանի իշխանությունների վերաբերմունքի համար։
Երևանի եւ Թեհրանի միջև տնտեսական համագործակցության մասին
Փաշինյանն ասել է, որ Հայաստանն ու Իրանը փոխըմբռնման հուշագիր են ստորագրել էներգետիկայի և գազի ոլորտում համաձայնագրի երկարաձգման վերաբերյալ։
«Այսօրվա հանդիպումներն ու խորհրդակցությունները կարող ենք օգտակար համարել, և ես ուրախ կլինեմ վկայել արդյունքների մասին»,- ասել է ՀՀ վարչապետը։ Ռաիսիի խոսքով, Փաշինյանի հետ բանակցություններում քննարկվել են երկկողմ առևտրատնտեսական հարաբերությունների զարգացումը և անվտանգության ոլորտում համագործակցությունը։
Իրանի նախագահի խոսքով, վերջին մի քանի ամիսների ընթացքում Հայաստանի հետ ապրանքաշրջանառության ոլորտում գրանցվել է 43 տոկոս աճ։ Նա նշել է, որ խնդիր է դրվել երկու երկրների միջև ապրանքաշրջանառության ծավալը հասցնել 3 միլիարդ դոլարի՝ ավելացնելով, որ դա իրատեսական է երկու երկրների ցանկության դեպքում։ Ռաիսին հույս է հայտնել նաև Թեհրանի և Երևանի միջև ձեռք բերված պայմանավորվածությունների իրականացման համար։
«Մեր բանակցությունների զգալի մասը վերաբերում է տնտեսական հարաբերություններին, առևտրի ծավալների ավելացմանը և էներգետիկայի, գյուղատնտեսության, ենթակառուցվածքների և ջրային տնտեսության ոլորտներում համագործակցության զարգացմանը»,- իր հերթին ասել է Փաշինյանը։ Այդ հարցերը պետք է լրջորեն դիտարկվեն երկու երկրների համապատասխան իշխանությունների կողմից բանակցությունների ավարտից հետո, հավելել է նա։
ՀՀ կառավարության լրատվական ծառայութունից տեղեկացնում են նաև, որ Փաշինյանը պատրաստակամություն է հայտնել Ռաիսիին հյուրընկալել Հայաստանի Հանրապետությունում՝ վերոնշյալ խոսակցությունը շարունակելու համար:
