Լեմկինի անվան ցեղասպանության կանխարգելման ինստիտուտն ուշադրություն է հրավիրել վարչապետ Նիկոլ Փաշինյանի վերջին հայտարարություններին, որոնք, ըստ կազմակերպության, կրկնում են Հայոց ցեղասպանությունը ժխտող թուրքական թեզերը։
Այս հայտարարությունները, ըստ Լեմկինի ինստիտուտի, հատկապես տագնապալի են՝ ելնելով Հայաստանի արտգործնախարարության կողմից Հայոց ցեղասպանությունն արտաքին քաղաքականության առաջնահերթությունների ցանկից հանելու վերջին որոշման լույսի ներքո, ինչը վտանգի տակ է դնում զոհերի և նրանց ժառանգների իրավունքները:
Փորձագետները հիշեցրել են, որ Հայոց ցեղասպանության պատմական իրողությունը հաստատվում է բազմաթիվ աղբյուրներով, այդ թվում՝ Օսմանյան կայսրության փաստաթղթերով, դիվանագիտական զեկույցներով և ականատեսների վկայություններով։
«Ցեղասպանություն» եզրույթն ինքնին ներմուծվել է Ռաֆայել Լեմկինի կողմից, ով հայեցակարգը մշակելու համար օգտագործել է Հայոց ցեղասպանության օրինակը։ Լեմկինն առանցքային դերակատարություն է ունեցել 1948 թվականի Ցեղասպանության մասին կոնվենցիայի ստեղծման գործում, որը սահմանել է նման հանցագործությունները կանխելու իրավական մեխանիզմներ:
Ինստիտուտը շեշտել է, որ վարչապետ Փաշինյանի հայտարարությունները կարող են խաթարել Հայոց ցեղասպանության միջազգային ճանաչմանը հասնելու Հայաստանի ջանքերը, ինչպես նաև թուլացնել նրա ինքնիշխանությունն ու անվտանգությունը։
Լեմկինի ինստիտուտը միջազգային կազմակերպություն է, որը նվիրված է ցեղասպանության կանխարգելմանը և մարդու իրավունքների սկզբունքների առաջմղմանը։ Անվանվել է իրավաբան Ռաֆայել Լեմկինի պատվին, ով հորինել է «ցեղասպանություն» տերմինը և մշակել զանգվածային հանցագործությունների դեմ պայքարի հիմնական սկզբունքները:
Հունվարի 24-ին Շվեյցարիայի հայ համայնքի ներկայացուցիչների հետ հանդիպմանը Փաշինյանը, պատասխանելով Հայոց ցեղասպանության մասին հարցին, ասել էր, որ «պետք է հասկանալ՝ ի՞նչ է տեղի ունեցել և ինչո՞ւ, ինչպե՞ս ենք մենք դա ընկալել, ո՞ւմ միջոցով ենք ընկալել»։ Նա հավելել էր՝ «ինչպե՞ս է, որ 1939 թվին Հայոց ցեղասպանության օրակարգ չկար և ինչպե՞ս է, որ 1950 թվին Հայոց ցեղասպանության օրակարգ է հայտնվել»։ Նա հայտարարել էր Հայոց ցեղասպանության պատմությանը «վերադառնալու» անհրաժեշտության մասին։
Հայոց ցեղասպանության թանգարան-ինստիտուտի նախկին տնօրեն Հայկ Դեմոյանն Armenia Today-ին տված հարցազրույցում նշել էր, որ Հայոց ցեղասպանության վերաբերյալ մեսիջներով Փաշինյանը փորձում է հաճոյանալ Թուրքիային և Ադրբեջանին։
