Ամերիկացի լրագրող Թաքեր Կարլսոնի հետ հարցազրույցում «Մեր ձևով» շարժման համակարգող Նարեկ Կարապետյանը պատմել է հայ ինքնության համար քրիստոնեության կարևորության, Հայաստանի իշխանությունների կողմից հակաեկեղեցական արշավի և «Տաշիր» ընկերությունների խմբի նախագահ Սամվել Կարապետյանի նկատմամբ հետապնդումների մասին:
Հայկական ինքնության, Հայոց ցեղասպանության և Արցախյան հակամարտության մասին
Հարցազրույցի ընթացքում Կարապետյանը պատմել է 1915 թվականի Հայոց Ցեղասպանության մասին՝ ընդգծելով, որ Հայաստանը կորցրել է իր բնակչության մոտ 70%-ը, քանի որ 1,5 միլիոն հայ հրաժարվել է կրոնափոխ լինել: Նա նաև բացատրել է, որ հայերն աշխարհի ամենահին քրիստոնյա ազգն են, քանի որ նրանք առաջինն են ընդունել քրիստոնեությունը 301 թվականին՝ Հռոմի կայսր Կոստանդին I-ից 11 տարի առաջ:
Շարժման համակարգողը շեշտել է Հայ եկեղեցու և հայ ինքնության միասնականությունը: Ըստ Կարապետյանի՝ հայ ինքնության 70-80%-ը բխում է քրիստոնեության և Հայ եկեղեցու արժեքներից: Նարեկ Կարապետյանը նաև խոսել է հայ-ադրբեջանական հակամարտության մասին՝ նշելով, որ Լեռնային Ղարաբաղի քրիստոնյա բնակչությանը պաշտպանելու ընթացքում զոհվել է շուրջ 20 000 հայ: Վերջին պատերազմից հետո հայ բնակչությունը լքել է տարածաշրջանը, և 2000 տարվա բնակությունից հետո Լեռնային Ղարաբաղում ներկայումս քրիստոնյաներ չկան, ընդգծել է նա։
Հարցին, թե ի՞նչ պատճառներով են արևմտյան առաջնորդները լռում այս հարցում, Կարապետյանը կարծիք է հայտնել, որ դա «ռեալպոլիտիկի հարց է»։ Շեշտելով, որ հայ ժողովուրդը տարածաշրջանում որպես քրիստոնյա անընդհատ ճնշվել է, Կարապետյանը նշել է, որ այս պայմաններում իրենց մշակույթը պահպանելու հարցում միավորող միակ կառույցը Հայկական եկեղեցին էր։
Հայաստանի իշխանությունների հակաեկեղեցական արշավի պատճառների մասին
Կարապետյանը նշել է, որ պատերազմում պարտությունից հետո Հայաստանի ներկայիս վարչապետ Նիկոլ Փաշինյանը ձգտում է բարելավել հարաբերությունները Ադրբեջանի հետ։ Կարապետյանի խոսքով՝ Թուրքիան և Ադրբեջանը ձգտում են ստիպել վարչապետին փոխել Հայ Առաքելական եկեղեցու պատմությունը և փոխարինել նրա առաջնորդին՝ «մոռացության տալով Ցեղասպանությունը, պատմությունը և խաղաղության պայմանագիր կնքել Ադրբեջանի հետ»։
Շարժման համակարգողը նաև կարծիք է հայտնել, որ վարչապետը ձգտում է փոխել եկեղեցու 1700-ամյա կառուցվածքը և վերահսկողություն հաստատել դրա նկատմամբ։ Կարապետյանը խոսել է եկեղեցու դեմ հարձակումների և Հայ Առաքելական եկեղեցու երեք արքեպիսկոպոսի ձերբակալության մասին: Նշելով, որ Հայաստանը ժողովրդավարական երկիր է, Կարապետյանն ընդգծել է, որ Փաշինյանը տարեցտարի ժողովրդավար առաջնորդից վերածվում է ավելի ու ավելի ավտորիտար ղեկավարի:
Նրա խոսքով՝ վարչապետի գործողությունները Հայ Առաքելական եկեղեցու դեմ ցնցել են հայ հասարակությանը, սակայն կառավարության գործողություններին դեմ արտահայտվող շատ ազդեցիկ գործիչներ լռել են՝ վախենալով հաշվեհարդարից:
Սամվել Կարապետյանի նկատմամբ հետապնդումը
Միակ անձնավորությունը, ով սկսեց խոսել եկեղեցու դեմ գործողությունների մասին, Սամվել Կարապետյանն էր, ընդգծել է շարժման համակարգողը: Նա հիշեցրել է, որ Կարապետյանն աշխարհի ամենահարուստ հայերից է և վերջին 15 տարիների ընթացքում ամենախոշոր հայ բարերարը:
Նարեկ Կարապետյանը մեջբերել է Սամվել Կարապետյանի 37 վայրկյան տևողությամբ հարցազրույցը՝ եկեղեցու դեմ իշխանությունների գործողությունների վերաբերյալ, որը հանգեցրել է գործարարի նկատմամբ քրեական հետապնդման: Շարժման համակարգողը նկարագրել է հարցազրույցից հետո վարչապետի կողմից ոստիկանություն ուղարկելը Կարապետյանի տուն, ինչպես նաև նրա ձերբակալության հանգամանքները: Նրա խոսքով՝ քննիչները մանրամասն քննարկել են, թե ի՞նչ մեղադրանքներ առաջադրեն Կարապետյանի դեմ:
Նշելով, որ «Տաշիր» ընկերությունների խմբի նախագահը մեղադրվում է վարչապետին «տապալելու փորձի» մեջ, Նարեկ Կարապետյանը շեշտել է, որ գործարարի հարցազրույցում կառավարության ղեկավարի կամ նրա տապալման մասին ոչ մի հիշատակում չկա։
«Նա դեռևս բանտում է՝ եկեղեցին պաշտպանելու և այդ 37 վայրկյանի համար»,- ասել է Կարապետյանը։
Շարժման համակարգողը նշել է, որ Հայաստանի բնակչության 90%-ը դեմ է իշխանությունների կողմից եկեղեցու դեմ արշավին։
«Մեր հասարակությունը չի հասկանում, թե ինչու է նա դա անում»,- մանրամասնել է Կարապետյանը։
Նրա խոսքով՝ Փաշինյանը փորձում է բռնի կերպով փոխել հայ հասարակությունը՝ հակադրվելով ավանդական արժեքներին։
Կարապետյանը դրական է պատասխանել Կարլսոնի այն հարցին, թե արդյոք վարչապետը փորձո՞ւմ է հայ հասարակությունը «պակաս քրիստոնյա» դարձնել։ Նարեկ Կարապետյանն ընդգծել է, որ «Տաշիր» ընկերությունների խմբի նախագահըը, չնայած իր կալանավորմանը և իր բիզնեսը բռնագրավելու սպառնալիքներին, կշարունակի պաշտպանել եկեղեցին։
«Իմ հորեղբայրը՝ Սամվել Կարապետյանը, և հոգևորականները կարող են վաղն ազատ արձակվել, եթե ասեն, որ չեն պաշտպանելու եկեղեցուն։ Նրանք ուզում են բռնագրավել հորեղբորս բիզնեսը Հայաստանում, նա գիտի դա, բայց ուզում է պաշտպանել եկեղեցին նույնիսկ դրանից հետո»,- հայտարարել է Նարեկ Կարապետյանը՝ համեմատելով այս իրավիճակը 20-րդ դարի սկզբին Օսմանյան Թուրքիայում կրոնի համար հայերի դեմ հալածանքների և առաջին քրիստոնյաների ճնշման հետ։
Հունիսին «Տաշիր» ընկերությունների խմբի նախագահին կալանավորել էին եկեղեցու դեմ արշավը քննադատելուց հետո: Դատարանն օգոստոսի 15-ին երկու ամսով երկարացրել էր նրա կալանքը։ Ավելի ուշ Վերաքննիչ դատարանը մերժել էր փաստաբանների բողոքը խափանման միջոցը փոխելու վերաբերյալ՝ գործարարի կալանքն ուժի մեջ թողնելով մինչև հոկտեմբեր: Դատարանը հոկտեմբերի 16-ին 30 օրով երկարաձգել էր գործարարի կալանքի ժամկետը:
