«Տաշիր» ընկերությունների խմբի նախագահ, բարերար Սամվել Կարապետյանի կալանքը տոտալ ապօրինի է, հայտարարել է «Լուսավոր Հայաստան» կուսակցության նախագահ Էդմոն Մարուքյանը։
«Տվյալ քրեական գործով հիմնավոր կասկածի նվազագույն շեմն անգամ բավարարված չէ Եվրոպական դատարանի կողմից հաստատված նախադեպային իրավունքով։ Ամբողջ քրեական գործը կազմված է հարցազրույցի հիման վրա։ Կարապետյանը չի հրաժարվում, որ իր հարցազրույցն է և, հետևաբար, գործով վկաներ չկան»,- նշել է Մարուքյանը և պարզաբանել, որ միջդատական վարույթը չի կարող իր մեջ պատժի տարրեր ունենալ։
Ըստ նրա՝ Կարապետյանի կալանքն ամբողջությամբ քաղաքական գործընթաց է և կառավարվում է ՀՀ վարչապետ Նիկոլ Փաշինյանի կողմից։
«Դրա մասին մեզ վկաներ պետք չեն, որովհետև ինքն է անձամբ ասում, որ միջամտում։ Նա ֆեյսբուքյան իր էջում գրել էր՝ «հիմա ես կմիջամտեմ», և այդ պահին ոստիկանության հատուկ խումբը գրոհել է Կարապետյանի տունը և այդ ընթացքում, իմ տվյալներով, 51 մարդ է ձերբակալվել»,- նշել է Մարուքյանը։
Նրա խոսքով՝ եթե մեղադրանքի սանկցիայում կա տուգանք, ապա դատարանները չեն կալանավորում անձին։ Ըստ նրա՝ Փաշինյանի ուղիղ հրահանգով, իր Թուրքիա այցից առաջ, Կարապետյանին, այնուամենայնիվ, տարել են կալանքի։
«Ակնհայտ անմեղ մարդուն քրեորեն հետապնդելը քրեորեն պատժելի արարք է։ Բոլոր այն մարդիկ, որոնք ներգրավված են, մարդկանց թևեր են ջարդել, վնասվածք են պատճառել, անմեղ մարդկանց, որ ուղղակի էդտեղ կանգնած էին, բոլորը պետք է պատասխանատվության ենթարկվեն, սա հանցագործություն է»,- ընդգծել է Մարուքյանը։
Կարապետյանը հունիսի 17-ին մեկնաբանել էր Հայ Առաքելական եկեղեցու դեմ Հայաստանի իշխանությունների հայտարարությունները, ինչից հետո Ներքին գործերի նախարարության հատուկ նշանակության ստորաբաժանումները խուզարկություններ էին սկսել «Տաշիր» ընկերությունների խմբի նախագահի տանը՝ Երևանում։ Վարչապետ Նիկոլ Փաշինյանը խիստ էր արձագանքել Կարապետյանի հայտարարությանը:
ՆԳՆ-ից Armenia Today-ին մեկնաբանել էին, որ Կարապետյանի առանձնատան մոտ «մի խումբ անձինք բերման են ենթարկվել, իրականացվում են օպերատիվ գործողություններ»։ Խուզարկության մեկնարկից մոտ ութ ժամ անց՝ գիշերը ժամը երեքին, Կարապետյանը ոստիկանների ուղեկցությամբ դուրս էր եկել իր առանձնատնից և տեղափոխվել ՆԳՆ կազմակերպված հանցագործությունների դեմ պայքարի գլխավոր վարչություն, այնուհետև՝ Քննչական կոմիտե:
Ավելի ուշ ՔԿ-ն Armenia Today-ին հայտնել էր իշխանությունը զավթելու կոչեր անելու մեղադրանքով Կարապետյանին կալանավորելու միջնորդության մասին։ Ինքը՝ գործարարը, չի ընդունում մեղադրանքը և մտադիր է բողոքարկել այն բոլոր ատյաններում։ Կարապետյանի մամուլի ծառայությունն այս մեղադրանքներն անվանել էր ակնհայտ վախեցնելու և բռնաճշման փորձ։
Հունիսի 19-ին դատարանը երկու ամսով կալանավորել էր Կարապետյանին:
