Իշխանությունները խստացրել են պարտադիր զինվորական ծառայությունից և վարժական հավաքից խուսափելու պատիժները։ Որոշումն ընդունվել է կառավարության ապրիլի 3-ի նիստում։
Զինծառայությունից խուսափելը պատժվում է ազատազրկմամբ՝ նախկին 5-ի փոխարեն մինչև 6 տարի ժամկետով, իսկ նվազագույն պատժաչափը կավելանա 1-3 տարի ժամկետով։ Ընդ որում՝ վարժական հավաքներից խուսափելը կպատժվի ոչ թե առավելագույնը 2, այլ մինչև 3 տարի ժամկետով, իսկ տուգանքը կարող է տատանվել նվազագույն աշխատավարձի (75 հազար դրամ) տասնհինգապատիկից մինչև երեսնապատիկի չափով։
Համապատասխան փոփոխությունները կկատարվեն Քրեական օրենսգրքի 461-րդ և 462-րդ հոդվածներում։
Կառավարությունը 2024-ի նոյեմբերին ընդունել էր պարտադիր զինվորական ծառայության զորակոչի և պահեստազորային պատրաստության հրապարակային ծանուցման նախագիծը։ Փետրվարի 4-ին ՊՆ-ն առաջարկել էր փոխել գործող օրենսդրությունը, և վարժական հավաքներից խուսափելու մինչև 2 տարի ժամկետով պատիժը դարձնել մինչև 5 տարի։
Հայաստանում պահեստազորայինների վարժական հավաքներ կացկացվեն ապրիլի 1-ից մինչև հունիսի 13-ը։ Նախորդ հավաքներն անցկացվել էին փետրվարի 4-ից ապրիլի 18-ը։
